Inude eta Artzainek hartuko dute kalea igandean

Inude eta Artzainen desfilea egingo du Orereta Ikastolak igandean, hemeretzigarrenez.

2016/02/10

Iñude eta Artzainak

Inude eta Artzainen desfilea egingo du Orereta Ikastolak igandean, hemeretzigarrenez. Bertan parte hartuko dute Orereta Ikastolako hezkuntza komunitate osoak, ikasle, irakasle eta gurasoek, hain zuzen ere. Ereintza Elkarteak egin zuen lehenengoz desfilea 1979. urtean eta bi urtez eginda, Orereta Ikastolak hartu zuen lekukoa ondoren 1998. urtean hasita. Ordundik ez du hutsik egin ikastolak eta Inauterien ondorengo igandean garai bateko jantziz eta ohiturez betetzen ditu herri erdialdeko kaleak. Artzainak, inudeak, haur jaioberriak, alkatea eta bere ematzea, gotzaina, apaiza, medikua eta erizainak, puxika saltzaileak, argazkilariak, barkileroak, margolaria, zapata garbitzailea, lore saltzaileak, okinak eta kale garbitzaileak ez dira faltako. Orereta Ikastolarekin batera, Ereintza Elkarteko Txistulari taldea, Iraultza Dantza Taldea, Errenteria Musikaleko musikariak, dultzaina jotzaileak, trikitilariak, Amulleta Danbor Kofradia, eta hainbat kuadrilla gazte eta heldu izango dira desfilean eta guztiei eskerrak eman dizkie ikastolak. 250 gaztek eta 200 helduk osatutako konpartsa Errenteria-Oreretako kaleetan barrena ibiliko da Sarriegiren musika lagun 12:00etan Koldo Mitxelena plazatik abiatuta. Maria de Lezo, Xenpelar, Biteri, Alfontso XI, Kapitain Enea eta Biteri Txiki pasata Zumardian fandangoa eta arin arina dantzatuko dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.