Inbertitutako euro bakoitzeko hamar sortu ditu Albaolaren faktoriak

Iaz urtean 38.157 bisitari izan dira Ondartxon, ‘San Juan’ galeoia eraikitzeko lanak bertatik bertara ikusten; Proiektuaren eragin ekonomikoa Pasaiako badian, 2,6 milioi eurokoa izan da.

olatz mitxelena

Pasaia

2016/02/19

albaola, memoria, Izaskun Gomez, Xabier Agote, Raul Perez, Fernando Nebreda

Ondartxon, Albaolaren 2015. urteko memoriaren aurkezpena

«Eragin handia eta oso-oso positiboa». Hala definitu du Oarsoaldea Garapen Agentziako Fernando Nebredak Albaolaren proiektuak Pasaiako badian duen eragina. 2015. urteko memoria aurkeztu zuen atzo Albaolak, Ondartxon, Pasaiako udalean ordezkaritza duten talde guztiak bertan zirela. Pasaiako alkate Izaskun Gomez izan zen aurkezpenean, eta Oarsoaldeako Nebredaz gain, Albaolako Xabier Agote eta Raul Perez izan zituen ondoan. Albaolak Pasaiako badian izandako eragin ekonomiko eta sozialaren azterketa egin du aurten lehen aldiz Oarsoaldeak, eta jasotako ondorio nagusiak publiko egin zituzten atzo. 38.000 bisitari 2015. urtean 38.157 bisitari igaro dira San Pedroko ontziolatik. Horrez gain, itsas faktorian 6.500 ikasle baino gehiago izan direla aipatu zuten, eta antolatutako kultur jardueretan 9.000 lagunetik gora parte hartu dutela. Horrez gain, gaur egun, Albaolak 600.000 euroko aurrekontua duela eta %61 finantzatua dela zehaztu zuen Albaolaren zuzendari Raul Perezek. Datu asko, eta gehientsuenak oso esanguratsuak aipatu zituzten. Besteak beste, faktorian, gaur egun 65 boluntario ari direla lanean, eta 18 langile dituztela; baita 20 lagun praktiketan ari direla ere, edota Albaolaren webguneak 200.000 bisitatik gora izan dituela. Eragin ekonomikoa Bildu dituzten datu ekonomikoetan oinarrituta Nebredak esan zuen erakunde publikoek Albaolan inbertitu duten euro bakoitzeko, kultur faktoriak hamar eurotik gora sortu dituela. Izaskun Gomez alkateak, bide beretik, Albaolaren bilakaera goraipatu zuen, eta biziberritzeari egin dion ekarpena txalotu, eta bide horretan, gaur gaurkoz modu eraginkor batean lanean ari den proiektu bakarra dela adierazi zuen.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.