Guadalupe Plata eta Lie Detectors, indar koktela OarsoMusikaren eskutik

Andaluziako eta Donostialdeko taldeek Niessen Kulturguneko oholtza partekatuko dute gaur gauean. Sarrerak aldez aurretik erosteko aukera, gaur goizean eta arratsaldean, hamar euroan

Urko Etxebeste Petrirena

Errenteria-Orereta

2016/02/26

Guadalupe Plata taldea, iazko Irun Rock jaialdian

Modan, bogan, olatuaren gandorrean dagoen taldea da Guadalupe Plata. Ubedakoa (Jaen, Espainia) da hirukotea, triste antzean bizi dira, musika ekoizpenaren legeetatik urrun, nagi samar. Hain dira nagiak, kaleratu dituzten hiru diskoek, azkena 2015ekoa, izenburu berbera dutela; are gehiago, diskoen izena taldearena da: Guadalupe Plata. Baina taldearen eta diskoen izena hautatzerakoen ere ez zuten gehiegi estutu garuna: Ubedako zaindaria da Guadalupeko amabirjina. Triste, nagi, baina onak. Kalitatezkoak, ia genialak, batzuetan azkar, besteetan indartsu eta motel. Blues, psychobilly, edo roots rock estiloen eremuan ibiltzen dira andaluziarrak, elektronikarik gabe, eta etxean egindako instrumentuekin. Gaurko musika emanaldia 22:30ean hasiko da, Lie Detectors energiaz beteriko taldearekin. Guadalupe Platakoei izerdi tantez beteta utziko diete oholtza Donostialdeko taldekoek; andaluziarrei ez zaie inportako hezetasuna, ziur. Izan ere, eskarmentu handikoak dira gaurko teloneroak, bertako partaideak gitarra eta bateria asko hautsitakoak baitira hamarnaka urteko bidea eginda dutelako gezurren detektagailua asmatu baino lehen, hala nola, Nuevo Catecismo Catolicon, Muturbeltzen, Dirty Pink Ladies-en, edo Fiebre de Vivir taldean. Iaz hasi ziren euren lehen kontzertuak ematen Lie Detectors-ekoak; Espainiako Estatuko zuzeneko onena dutela erabaki zuen Ruta 66 musika aldizkariak, garaje eta punk doinu zuzen eta sinpleek euren zuzenekoari adrenalina ematen dietelako. Sarrerak Gaur, kontzerturako sarrerak, 10:00etatik 13:00etara eta 17:00etatik 20:00etara eros daitezke Niessen Kulturgunean, 10 euroan. Merke. OarsoMusika elkarteak esan zuen 2016a indartsu zetorrela. Ez zuten gezurrik esan; ez, bederen, gaurkoagatik.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.