Bere ondasun guztiak adin txikiko ahulenen alde

Gabriel Vicente Letamendiak Gipuzkoako Foru Aldundiaren esku laga du zuen guztia, "haur abandonatuei laguntza ematen dien departamentuan inbertitzeko"; aldundiak konfiantza eskertu eta publiko egin du erabakia

olatz mitxelena

Pasaia

2016/03/01

Imonal Lasa, partaidetzatko foru diputatua

Imanol Lasa, partaidetzazko foru diputatuak eman du albistea

Inork ez zuen haren berri aldundiak gaur publiko egin duen arte. Gabriel Vicente Letamendia pasaitarrak (Pasaia, 1946-2015) Gipuzkoako Foru Aldundiari utzi dio bere ondare guztia. Aldundiak gaur jakinarazi du, eta haiengan jarritako konfiantza eskertu eta bere hilosteko “esker onik beroena eta aitortzarik zintzoena” egin dio Letamendiari. Babesgabetasun egoeran dauden haurren arretara bideratzeko utzi zion bere ondarea Letamendiak Aldundiari. Ondorengorik gabea, testamentu irekia egin zuen pasaitarrak, hauxe xedatuz: “Bere ondare, eskubide eta akzio guztien oinordeko ezartzen du Gipuzkoako Foru Aldundia, haur abandonatuei laguntza ematen dien departamentuan inbertitzeko”. Honenbestez, etxebizitza bat, ibilgailua eta kapital higigarria jaso ditu aldundiak, eta ondasunak eta eskubideak babesik gabe dauden adingabeen esparruari lotutako xedeak eta helburuak betetzera bideratuko dituela agindu du, “oso-osorik”. “Uste dugu justizia kontua zela erabaki hau publikoki ezagutaraztea, eta konpromisoa hartzen dugu zenduaren borondatea betearazteko Politika Sozialetako departamentuaren bitartez, gure gizartean babes gutxien dutenen arreta bermatuz, profesionaltasunez eta eraginkortasunez”, adierazi du Imanol Lasa foru bozeramaleak. “Foru Aldundiarengan jarri zuen konfiantzari ez diogu huts egingo”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.