Lezoko Gazte Asanblada, euskararen erabileran eragiteko prest
Lezoko Gazte Asanblada herriko gazteen euskara erabilerarekin kezkatuta dago. Horretan indarra jarri eta eragin nahi du.
Lezoko Gazte Asanbladaren jaietako bazkaria
Lezoko gazteen artean euskararen erabilerak behera egin du azken urteetan. Hori adierazten dute Soziolinguistika Klusterrak herrian bildutako datuek. Lezoko Gazte Asanblada (LGA) kezkatuta dago horregatik, eta euskararen erabileran eragin nahi du. Zentzu horretan, igandean tailerra egingo dute (17:30ean, Kultur Aretoan), mahaiaren gainean gaia jartzeko, eta egoera hori iraultzeko.
Deialdia irekia da, “euskarak ardura sortzen dien gazteei” zuzendua, LGAk bere Facebook atarian adierazi duenez. Etziko saiorako helburua ere badute: “Erdaraz hitz egitera zerk bultzatzen gaituen ikusi nahi dugu, hortik abiatuta, euskaraz hitz egiteko arrazoi eta baldintzak bilatzeko”.
Saioaren formatua mahai-inguru gisakoa izango da, eta partaideek talde txikietan banatuta egingo dute gogoeta, hiru bloketan: sarrera, datuen berri eman, eta ideiak plazaratu.
Gazte lezoarrei jardunaldira joateko eskatu diete LGAko ordezkariek.
