Txatarraren gainbehera eta automobil trafikoaren gorakada

Otsailera arte, portuko trafikok %1,7 egin du gora

olatz mitxelena

2016/03/07

Pasaiako portutik Anberesera, edukiontziz betetako lehen ontzia

Txatarraren trafikoaren gainbehera bestelako produktu siderurgikoen gorakadarekin konpentsatu egin dela jakinarazi du gaur Pasaiako Portuko Agintaritzak. Zehaztu dutenez, bukatutako produktu siderurgikoen garraioa %18,16 handitu da otsaila bitartean, iazko datuekin alderatuta. Txatarraren trafikoak, aldiz, %27,3 egin du behera. Nabarmen goraka, automobilen trafikoa ari da baita ere. Kotxe eta furgoneten trafikoa oso bilakaera positiboa izaten ari dela dio Portuak, otsaila bitartean %22,29 hazkundea izan duela goraipatuz. Bestelako produktuak Zerealen trafikoa asko hazi da, %147,38; aitzitik, ongarrien eta pentsuen beherakada handia izan da; % 40,23 eta %38,59 hurrenez hurren. Portu Agintaritzaren arabera, datuek erakusten dute salgai orokorrek eta erantsi altuko produktuen trafikoak, solteko gaien produktuena ordezkatzen ari direla pixkanaka, solteko gaiak “balio gutxiagokoak eta potentzialki zikinagoak” direlako, nahiz eta manipulazioan baliabide eta trebetasun gutxiago eskatu. Ohartarazi dutenez, testuinguru horretan kokatu behar da edukiontzien garraioaren gorakada. Portuak jakinarazi duenez, edukiontzien trafikoak, eskala bakoitzeko 200 TEU-ak gainditzen ari da. Arrain-deskargen egoera egonkorra dela jakinarazi du Portuak, eta arrainaren prezioaren bilakaera positiboa izaten ari dela nabarmendu du. Alturako arrain freskoaren prezioak %12,6 egin du gora. Pasaiatik esportatzen diren produktu gehienak Erresuma Batura doaz; inportazioei dagokionez, aldiz, Belgika eta Alemania dira herrialde garrantzitsuenak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.