Kirol instalazioak hobetu eta materiala erosteko inbertsioak egingo ditu udalak
Futbol 7 zelaia erabilera publiko espazio gisa erabiltzeko proiektua idazten ari da horren harira Hirigintza saila.
Errenteriako Udaleko Kirol sailak jakinarazi duenez, datozen asteetan kirol materiala erosi eta kirol instalazioetan biziberritze lanak egiteko hainbat inbertsio egingo ditu. Futbol 7 zelaia erabilera publiko espazio gisa erabiltzeko proiektua idazten ari da horren harira Hirigintza saila, eta bertarako aulki berriak erosiko ditu udalak. Halaber, kirol gune horretako tenis pistak ibaiaren parean dagoen bidegorriarekin lotuko dituzte. Touringen zelaiaren itxitura sendotzea aurreikusi dute bestalde, “jendea espazio horretara sartzea saihestearren. Espazio horiek hobetzeko bestelako ekintza sorta ere egingo du udalak”, azaldu dute.
Kirol instalazioei dagokienean, Beraungo futbol zelaian arkupea eraikiko dute estadioko sarrera estali asmoz. Baita auzo horretako igerilekuan ere, kasu horretan, 25 metroko luzera duen estalpea jarriko du udalak. Beraunen bertan, Beraun kalean kokatutako pilotaleku txikiaren egitura zabalduko du udalak, “gaur egun euria egiten duenean ez dagoelako erabiltzerik. Zabaltzeko metalezko egitura baliatuko du udalak”. Galtzarabordako kiroldegiaren teilatua erabat berritzeko proiektua enkargatu du udalak, eta azkenik, Beraungo Erabilera Anitzeko Pistan azken lanak egingo ditu jarduera lizentzia lortzeko.
Inbertsioen bidez zerbitzua etengabe hobetzeko konpromisoa mantendu nahi duela esan du udalak, “herritar guztiek kirol onstalazioetara hurbiltzeko erraza izan dezaten”. 
