Gipuzkoako Batelen Ligan, zortzi kategorietatik hirutan dira nagusi errenteriarrak
Atzoko estropadaren irudi bat
Gipuzkoako Batel Ligako zortzi jardunaldi jokatu direnean —otsailaren 21 eta 28an ez zen izan lehiarik, eguraldiagatik—, zortzi kategorietatik hirutan lehen postuan daude Hibaikako ontziak. Denak ala denak, emakumeen kategorietan gainera: Haur Mailan, Promesa Mailan, eta Absolutu Mailan. Oarsoaldeko beste ontzi bat, San Juanen gizonen Absolutu Mailakoa, lider da ere bere kategorian. Beraz, Oarsoaldeko batelak nagusi dira kategoria guztien artetik horien erdian. Esteka honetan,
sailkapen guztiak, PDF formatuan.
Atzo (igandea) Pasaiako badian Trintxerpe-Illunbek antolatutako estropadan sailkapen nagusiko emaitza horiek berretsi egin ziren. Hibaika irabazle izan zen nesken haurretan eta absolutuetan (bigarren postuan ere eskuratu zuen maila honetan), eta hirugarren nesken promesetan.
San Juanen ontzien posturik onenei dagokienez, nesken promesetan bigarren izan ziren arrosak, nesken Gazte Mailan hirugarren, mutilen kadeteetan hirugarren ere, eta gizonen Senior Mailan berriz ere garaile.
Illunberen, San Pedroren eta Oiartzunen hainbat ontzik ere parte hartu zuten Pasaiako estropadan.
Liga bukatzeko bost estropada falta dira. Horien ondoren Gipuzkoako Txapelketakoak iritsiko dira. Honakoak, bateletan Gipuzkoan egingo diren azken estropadak:
- Hilaren 19an, Errenteria-Oreretan, Gipuzkoako Ligako 11. estropada.
- Hilaren 20an, Orion, Gipuzkoako Ligako 12. estropada.
- Apirilaren 2an, Orion, Gipuzkoako Ligako 13. estropada.
- Apirilaren 9an, Orion, Gipuzkoako Ligako 14. estropada.
- Apirilaren 10ean, Gipuzkoako Ligako 15. estropada.
- Apirilaren 16an eta 17an, Gipuzkoako Txapelketa Pasaian.
