Kepa Garbizu: "Bilketaren gaineko akordioak bere horretan jarraituko du"

EAJk eta EH Bilduk lortutako akordioak aurrera egingo duela esan du Garbizuk: "Lezoko EAJren batzordeak erabaki duelako eta bera da konpetentea".

Ikerne Zarate Gartziarena

Lezo

2016/03/14

Kepa Garbizu

EAJko zinegotziek zer egingo zuten eta hondakinen bilketaren gaineko akordioarekin zer gertatuko zen izan da zalantza nagusia Garbizuk dimisioa aurkeztu zuela jakin denetik. Garbizuk berak argitu ditu zalantzak, “udaletxean jarraituko dute alderdikideek, eta hondakinen bilketaren gaineko akordioak ere bere horretan jarraituko du, Lezoko EAJren batzordeak hala onartu duelako eta bera delako horretarako konpetentea. GBBk gustuko izan edo ez izan, akordioak bere bidea jarraituko du, onartuta dago eta ez du atzera bueltarik”. Ostegunean ez ohiko plenoa egingo du udalbatzak. Kepa Garbizu EAJko alkatearen dimisioa izango dute mahaiaren gainean eztabaidatzeko gai nagusi bezala zinegotziek. Ostiralean aurkeztu zuen dimisiorako idatzia udal erregistroan Garbizuk, eta orduan jakinarazi bazien ere bere alderdikideei, gaur goizean bilera luzea egin dute alkatetzaren bulegoan bertan Garbizuk eta zinegotzi taldeak. Eguerdi partean atera dira EAJko Lezoko zinegotziak udaletik, adierazpenik ez dute egin izan nahi. Alta, HITZAk Garbizurekin hitz egin du, eta oraindik alkate denak esan du bere dimisio erabakiak ez duela soilik harremana Lezoko EAJk eta EH Bilduk hondakinen bilketaren gainean egindako akordioarekin: “Luzeagoa da kontua, eta hondakinen gaineko akordioak eragina izan duela ukatu gabe, bestelako arrazoiak ere izan dira. Gipuzko Buru Batzarrean (GBB) halako diferentziak sortu dira, edo hobe esanda, sortu ditut, eta horren harira dator nire erabakia”. Garbizuren ustez —”nire uste apalean”—, GBBk “hanka sartzeak” egin ditu, “Lezo Garbia plataformari kasu egin diolako, eta egindako horietako batzuekin ni ez nintzen konforme. Alfonbra gorria jarri dio GBBk Lezo Garbia plataformari nolabait. Plataforma horrek presioa eragin duela zalantzarik ez dugu”. EAJk EH Bildurekin Lezon egindako akordioa GBBk ez duela gustuko ez du ukatu Garbizuk. Ostegunetik aurrera alkate izateari utziko dio Garbizuk, eta politikan jarraitzeko asmoa duen galdetuta argi erantzun du: “Ez, ez dut politikan jarraitzeko asmorik, gauza asko ditut egiteko eta egin gabeak”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.