Azken aldiz ikus ahal izango da irudi hau Lezon, baldin eta Kepa Garbizuren dimisioa onartzen bada
Ostiralean alkateak dimisio agiria erregistratu zuenetik, gauza asko gertatu dira Lezon. Horietako bat, gaurko udalbatzarra: berez hileko ohiko plenoa izan behar zena, Kepa Garbizuren dimisioa aztertu, eta ziurrenik onartuko den udalbatzarra izango da. 19:30ean da bilkura, udaletxeko areto nagusian.
Antza, hondakinen sistema mistoaren alde EH Bildurekin egindako akordioa dago dimisioaren oinarrian. Gipuzku Buru Batzarra (GBB) ez dago ados sistema mistoarekin, eta Kepa Garbizuk HITZAri aste honetan esandakoengatik, litekeena da Lezo Garbia plataformako kideek presioa egin izana GBBri neurriak hartzeko. Aste honetan bertan, Joseba Egibar GBBren buruak esan du Lezon hondakinen gaineko kontsulta egin beharko litzatekeela.
Baina Garbizuk iradoki zuen sistema mistoaren akordioa baino lehenagotik datozela, nolabait esatearren, ikusmolde aldeak: aurrekari horiek 2016ko udal aurrekontuak onartzeko unean, edo Lurraldeko Zatikako Planari (LZP) udalaren alegazio bateratua adosterakoan sortu ziren. Hiru kasuetan, aurrekontuenean, LZPrenean, eta sistema mistoarenean, EH Bildurekin egin ditu akordioak EAJk (bi alderdiek seina zinegotzi dituzte). Udal gobernuko kide da PSE-EEren zinegotzi bakarra.
Gauzak horrela, aste honetan GBBk eta Lezoko EAJren udal taldeak hainbat bilera egin dituzte, gaia bideratzeko edo. Orain ikusi beharko da, eta gaurko udalbatzarrean hori argi gera daiteke, ea herriko jeltzaleek, herrialdeko goi mailako EAJk, edo udal taldeko kideek; nork hartzen duen EAJren barruko krisia bideratzeko ardura. Gaur pista batzuk ikus daitezke, baina litekeena da, eta gaurko udalbatzarrean gertatzen denaren araberakoa izan daiteke, hurrengo egunetan mugimenduak egongo direla EAJren barruan, batez ere herrian.
Baina, gaurtik aurrera zer?
Gaur, Kepa Garbizuren dimisioa onartzen bada, hamar eguneko epea zabalduko da Lezoko alkate berria hautatzeko. Egun horien barruan deitu beharko dute beste pleno bat, eta bertan, alderdi guztiek aurkeztuko dute hautagaia.
Lehenengo errondan hautagairen batek zazpi aldeko bozka jasotzen baditu, gehiengo osoaren babesa, hura izango da alkatea. Ez bada hala gertatzen, bozka gehien jaso dituen alderdiaren hautagaiak hartuko du alkatetza.
Bitarte horretan alkateordeak, jarduneko alkate lanak egingo ditu. Noemi Arberas, EAJren zerrendako bigarrena da alkateorde, eta berak hartu behar luke behin-behinekoan herria gidatzeko ardura hamar eguneko epe horretan.
