Garbizu berak Lezoko Udala kudeatzeko duen proiektu eta lidergo falta estaltzeko bitartekoa izan dela dimisioa ere esan du.
Jose Angel Sanchez gaurko agerraldian
Kepa Garbizuren dimisioa Lezoko EAJk hondakinen gaiaren inguruan lezoarrei egindako “iruzurra estaltzeko ke gortina” baino ez dela esan du Jose Angel Sanchez PSE-EEko zinegotzi eta Lezoko gobernu taldeko kideak. “Baina ez hori bakarrik, –gaineratu du– Garbizu berak Lezoko Udala kudeatzeko duen proiektu eta lidergo falta estaltzeko bitartekoa izan da”. Horretarako, gainera, bere alderdia errudun egin duela esan du, “eta hori baino larriagoa dena, errua egotzi die berak agindutakoa sinistu zuten herritarrei, eta baita Lezo Garbia plataformari. Alkatetza lortzeko erabili zituen herritar horiei iruzur egin die eta gutxietsi ditu nire ustez, eta atez atekoarekin EH Bilduk Lezon muntatu zuen negozioaren interes ekonomiko eta pertsonalen defendatzaile sutsuena bihurtu da, gainera”.
Sanchezek gogorarazi du EAJk agindu zuela aste honetan egingo zela hondakinen gaineko kontsulta, “ez da kasualitatea dimisioa kontsulta egiteko epea amaitu denean egitea. Epe hori martxoaren lehen hamabostaldia zen”. Aste honetan bertan Lezo Garbia plataformak eta PSE-EE alderdiak aurkeztutako mozioak aztertu behar zituen ez ohiko plenoa egin behar zuela udalbatzarrak ere esan du alderdi sozialistako ordezkariak, “bi mozioek kontsulta egiteko eskatzen dute”.
Arduragabekeria
“Koldarkeria eta arduragabekeria” egotzi dizkio Garbizuri dimisioa aurkeztu izanagatik. “Koldarkeria, ez delako ausartu pleno batean atez ateko sistema defendatzen bera bozkatu zutenen aurrean. Arduragabekeria, behin-behineko egoeran utzi duelako Lezoko Udala”. Egoera “kafkianoa” dela gaineratu du Sanchezek, “atzo bertan sistema mistoaren alde egin zuelako berriz ere”. Sanchezen aburuz, ez du zentzurik adierazpen horrek, “jarraitu zezakeelako orduan alkate izaten”.
Garbizuk kargua utzita, zerrendan hurrengoa sartuko da udaletxean, Jesus Mari Martiarena. Martiarena Lezo Garbia plataformako ordezkari nabarmenetako bat dela esan du Sanchezek, “ez badio karguari muzin egiten edo ez badute horretara eramaten, paradoxikoa izango da egoera”.
EAJri aurrerantzean hondakinen gainean hartuko duen bidea ahalik eta azkarren argitzeko eskatu dio Sanchezek: “Espero dut zentzuz jokatzea eta hauteskundeetan egin zuen galdeketarako eta 5. edukiontzia jartzeko agindua betetzea”. 5. edukiontziaren alde egiten duela PSE-EEk eta kontsultaren alde ere egiten duela gaineratu du.
Gobernu taldeko kide gisa “iruzurtuta” sentitzen da Sanchez, eta EAJk aurkeztuko duen hautagaiarekin “harremanak berhartzeko” asmoa duela esan du. Horren arabera erabakiko du PSE-EEk bere bozka alkate berria erabakitzeko unean.
