Gure Esku Dago-k galdeketa antolatuko duela iragarriko du etzi

Agerraldi jendetsua egin nahi du galdeketa iragartzeko erabakitzeko eskubidearen aldeko taldeak.

olatz mitxelena

2016/03/18

Gure Esku Dago-ren jarduera, Eskoziako galdeketaren harira, Donostian

Beste hainbat herri eta eskualdeetan bezala, Oarsoaldean ere independentziari buruzko herri kontsulta egitea erabakia du Gure Esku Dago-k. Herriz herri aritu dira orain arte proposamena lantzen, lantaldeetan, eta denen baiezkoarekin iragarriko dute etzi «unea iritsi» dela: «Pausua ematera goaz». 12:00etan, Xabier Olaskoaga plazan egingo dute herri kontsultaren aurkezpena. Plazan argazki jendetsua atera nahi dute, askotarikoa eta parte hartzearen ikuspegitik ahalik eta zabalena. Helburu horrekin deialdia luzatu diote jendeari, gonbita eginez erabakitzeko eskubidearen alde dagoen orori argazki horretan izan dadin. Herri galdeketa noiz eta nola izango den, zein gainontzeko xehetasun guztiak etzi azalduko dituzte. Bizkor handitzen Gure Esku Dago iniziatibaren bueltan antolatutako lehen herri kontsultak aurten izango dira. Azpeitian ekainaren 12an izango dela iragarri dute, eta ekainaren 19an egingo dituzte galdeketak Goierriko 22 herrietan, Diman eta Ispasterren. Debagoienan ere egingo dute aurten kontsulta, baita Bakaikun eta Aramaion ere. Baina, horiek bakarrik ez. Bizkor ari da handitzen kontsulta egiteko asmoa iragarri duten herri eta eskualdeen zerrenda. Hernanik erabakia hartu du, baita Usurbilek ere. Oarsoaldean bezala, bi herri horietan ere 2017an izango dira galdeketak. Euskal Herrian, herri kontsulten bidean aitzindari, Etxarri Aranaz izan zen. 2014. urtean. antolatu zuten lehen galdeketa nafarrek. Urte berean egin zuten galdeketa Arrankudiagan ere

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.