Aretxabaletaren kontra jokatuko du Pasaiak igandean
Aretxabaleta sailkapeneko azken tokian da; Pasaia bederatzigarren
3. Mailako Pasaiak baino ez du jokatzen asteburuan. Gainontzeko talde guztiek atsedena dute. Zuri-gorriak, printzipioz, faboritoak dira iganderako lehiara begira. Kontrarioaren etxean dute partida, igande arratsaldean, 16:30etik aurrera. Aretxabaleta sailkapeneko azken postuan da, eta, teorian, zuri-gorriek ez lukete arazorik izan beharko gailentzeko. Nagusitasuna, hala ere, zelaian frogatu behar.
Ondarroaren kontra jokatu zuen lehengo asteburuan Pasaiak, Don Boscon, eta 2 eta 1 irabazi zuten. Honenbestez, Liga bukatzeko sei jardunaldiren faltan, zuri-gorriek 42 puntu gehitu dituzte eta sailkapenaren bederatzigarren postuan dira.
Batelak
Pazko Astean atsedenik ez duten besteak, arraun taldeak dira. Gipuzkoako Batel Ligak Orion du zita bihar, 11:00etan. Han izango dira Koxtapeko, San Pedroko eta Illunbeko batelak lehian.
