Udaberri On festan murgildu dira San Pedroko gazteak
17:00etatik aurrera kontzertuak izango dira Ertin, Pangea, Indian Feathers eta Tocac@jones taldeekin. DJ batek emango dio bukaera festari.
Askalitz gazte taldeak antolatuta Udaberri On festa egiten ari dira gaur San Pedron. Herri poteoarekin hasi dute jaia eguerdian eta frontoitik abiatuta tabernaz taberna ibili dira gazteak trikitrixaren laguntzarekin. Bazkarian 60 lagun bildu dira Antxeta elkartean itsaski paellaren bueltan, eta arratsaldean berriz, 17:00etatik aurrera kontzertuak izango dira Ertin, Pangea, Indian Feathers eta Tocac@jones taldeekin. DJ batek emango dio bukaera festari.
Amaia Muguruza eta Haizea Ibargarai Askalitzeko kideak dira. Iaz biltzen hasi zirela gazte batzuk esan du Muguruzak, “helburua herrian zer egitea genuen hausnartzea zen, eta ohartu ginen aisialdiari begira zerbait antolatzea genuela gazteentzako”. Horrela sortu zen iaz lehenengoz San Pedron egin zuten Gazte Eguna, eta ondoren jaietan ere parte hartu du Askalitzek. “Aurten ere zerbait antolatu nahi genuen gazte egunaz eta jaietaz aparte, eta Udaberri On festa hau antolatzea otu zitzaigun, gazteak aktibatu eta aukerak sortzeko”, gaineratu du Muguruzak.
Gaurko festaren antolaketan Proisaren laguntza izan du gazte taldeak.
Askalitz izenaren gainean galdetuta, berriz, orain urte batzuk San Pedron izandako aisialdi talde batetik hartu dutela esan du Ibargaraik. Une honetan 20 lagun ari dira aktiboki lanean Askalitzen eta gero horiekin bat egiten dute gainontzeko kuadrillek. 
