Bidarteko hilketa salatu dute Oarsoaldeko lau udalek
Mugimendu feministak gaurko eta biharko deitutako mobilizazioetan parte hartzera deitu dute
Asteartean Bidarten emakume bat hil zen, bezperan haren senarrak erasotu eta oso larriki zauritu ondoren. Oarsoaldeko udalek, Errenteriako Berdintasunerako Kontseiluak eta Pasaiako Emakumeen mahaiak “gertaera larritzat jo” eta bat egin dute Oarsoaldeko Mugimendu Feministek gaurko deitu duten deialdiarekin. 19:30ean da elkarretaratzea, Errenteria-Oreretako Niessen merkatalgunean.
Bide batez, herritar guztiei dei egin diete parte hartzera, gaurko elkarretaratzean zein bihar Gasteizen egingo den Euskal Herriko Mugimendu Feministak antolatutako manifestazio nazionalean.
“Jendaurrean eta aho batez adierazi nahi dugu emakumeenganako indarkeriaren aurkako jarrera agertuko dugula”, adierazi dute. “Horrelako gertaerak ez ditugu gure gizartean onartzen, eta erakunde, elkarte eta herritarrak lanean jarraituko dugu, emakumeok indarkeria matxistarik gabe bizi gaitezen”, gaineratu.
Azkenik, Oarsoaldeko udalek, Errenteriako Berdintasunerako Kontseiluak eta Pasaiako Emakumeen Mahaiak familiari “elkartasunik beroena” adierazi nahi izan die.
