2025 urterako 11 kilometro haziko da Errenteriako Txirrinda Sarea
Oinezkoen lehentasunezko sare bat prestatzea proposatu dute.
Errenteriako Oinezko eta Bizikleta bidezko Mugikortasun Plana onartu berri du udalak, eta horren arabera, 2025. urtean Txirrinda Sarea 14 kilometro izatetik, 25 izatera pasako da.. Lau helburu estrategiko dituela planak esan du Jose Cruz Legorburu Ingurumen zinegotziak: Oinezkoei joan etorrietan kalitatea eta segurtasuna eskaintzea, bizikleta bide seguru, eraginkorrra eta erakargarria izango dela bermatzea ahalik eta kosturik baxuenarekin, oinezkoak eta txirrindak bateratzea, eta eremu publikoa, ingurumena, bizi kalitatea eta osasun publikoa hobetzea.
Biztanle gehienak, oinez
Errenteriarren %10ak hiri barruan ibiltzeko autoa erabiltzen duela nagusiki garraiobide gisa esan du Legorburuk, “horrek eragina du garraiobide publikoaren funtzionamenduan, espazioaren okupazioan, ingurumenean, segurtasun faltan eta erosotasunean, eta bide publikoa erabiltzen duten gainerakoen osasunean”. Gainera kale asko ez direla ondorioz erakargarri merkataritzarako edo bizitzeko gaineratu du Ingurumen zinegotziak.
Oinezkoen aldeko hautua egiten duela udalak, “onura sozial handiena duen mugitzeko modua hori da”, eta horrenbestez, oinezkoen lehentasunezko sare bat prestatzea proposatu dute. Horren harira abiadura moteltzea, oinezkoen espazioa berreskuratzea, oinezkoa ahalduntzea, lehentasunezko sarearen ibilbideen kalitatea hobetzea, eta ibilbideen informazioari buruzko seinaleak jartzea erabaki dute.
Plana burutzeko 1.515.000 euroko inbertsioa egingo du udalak.
