Eragileei dei egin die udalak egitaraua osatzeko proposamenak lantzeko, eta hilaren 21ean (osteguna) bilera deitu du Xenpelar Etxean 19:00etan.
Udalerria itsasoari begira jarri du berriro jaialdiak. Lehenengo edizioko irudi bat
Hasi dira Atlantikaldiaren hirugarren edizioa diseinatzen, eta eragileei dei egin die udalak egitaraua osatzeko proposamenak lantzeko. Horretarako aukera izango dute maiatzaren 13a arte, eta aurretik, hilaren 21ean (osteguna) bilera deitu du udalak Xenpelar Etxean 19:00etan. Laura Landa Kultura teknikaria arituko da zuzendaritza lanetan aurreko bi edizioetan arrakastatsua izan den Atlantikoko herrien arteko musika eta kulturaren topagunea den jaialdian. Datu gehiegirik ez dago momentuz, baina aniztasuna izango du oinarri aurtengo edizioak, eta irailaren 22tik 25era egingo dute.
Hirugarren edizioa, “heldutasunarena” izango dela esan dute antolatzaileek: “Atlantikaldiak bota du dagoeneko aingura Errenteriako portuan, lehenengo bi edizioetan sustraitu egin da, aurtengoak berriz, etorkizunera eta mundu zabalera begira jarriko gaitu”.
Aniztasuna ardatz
Aniztasuna izango du ardatza Atlantikaldiaren aurtengo edizioak eta jarduera guztiek izango dutela anitzetik esan dute, “hizkuntza, jatorria, estiloa, nahasketa, adina, eskaintza”. Errenteriako “tosta” anitza dela gaineratu dute, “laurogei komunitatek osatzen dute herriko bizitza, eta herrian bizi dugun kultura eta hizkuntza aniztasuna Atlantikaldia aberasteko baliatu behar dugu, jaialdiari nortasuna emateko eta ezberdinen arteko elkarbizitza sustatzeko”.
Herritarrek eta herritarrentzat egindako jaialdia izaten jarraituko duela gaineratu dute, eta horren harira, herritar guztiak deitu dituzte ekarpenak egitera. Hiru bide izango dituzte horretarako, Atlantikaldiaren
posta elektronikoa, Errenteria Hiria Kulturgunean jaialdiak izango duen bulegoa eta
Atlantikaldiaren webgunean.
Proposamenak baloratzeko garaian, antolakuntza batzordeak aniztasunarekin harremana izatea, berrikuntza izatea, kultura edo herrien arteko harremana sustatzea, elkarlanetik sortua izatea, itsasoa ardatz izatea, kaletarra izatea, eta Atlantikaldiak sustatu nahi dituen baloreekin bat etortzea hartuko dute kontuan.
