Oarsoaldeko batelek ligan adina txapel irabazi nahi dituzte txapelketan

Bihar eta etzi Gipuzkoako Batel Txapelketa jokoan izango da Pasaiako badian .Maila bakoitzeko lehenek Euskal Herriko Txapelketarako txartela irabaziko dute

oarsoaldea

Pasaia

2016/04/15

Hibaika, gipuzkoako bat liga, arrunak, batelak, banderak

Hibaikakoak, lortutako hiru banderak ospatzen

Herrialdeko liga bukatuta, orain, txapelketaren txanda. Oarsoaldeko batelek Gipuzkoako Batel Txapelketan parte hartuko dute, bihar eta etzi, Pasaiako badian. Sanpedrotarra Arraun Elkarteak eta Gipuzkoako Arraun Federazioak elkarlanean antolatutako estropadak izango dira. Ligan lortutako lau txapelak —hiru Hibaikak, denak emakumeetan; bestea San Juanek gizonen seniorretan—, berdintzea dute Oarsoaldeko batelek erronka. Bihar, sailkapen estropada egingo dute badiaren San Pedroko aldean, 17:00etan. Zortzi kategorietako lau onenek finalak jokatuko dituzte etzi, eta 5-8 postuen artean sailkatu direnek Federazio Koparekin konformatu beharko dute. Horrela, kopa horretan ariko direnek hasiko dute igandeko estropada sorta (09:30ean), eta ondoren finalak eta sari emateak iritsiko dira. Arraun elkarte bakoitzak batel bakarra aurkeztu ahal izango du kategoria bakoitzeko. Hau da, ez da B edo C ontzirik egongo. Hortaz, batel guztietan elkarte bakoitzeko arraunlari onenak bilduko dira. Horrek esan nahi du ikuskizuna bermatuta dagoela. Legution, Euskal Herrikoa Eta ikuskizun horren partaide Hibaika, San Juan, San Pedro, Trintxerpe-Illunbe eta Oiartzun izango dira. Atzoko 19:30ak arte zuten izena emateko aukera arraun taldeek herrialdeko txapelketan (partaideen zerrenda ofiziala gaur jakinaraziko dute), eta gizonen seniorretan kenduta —Orio edo Hondarribia apunta daitezke; ligan ez zeuden bi horiek—, gainontzeko kategorietan ligako aktore berberak izango dira. Aktoreak, eta ahal balitz, emaitzak. Gipuzkoako lehenek Euskal Herriko Txapelketa izango dute jokoan hurrengo asteburuan Legution (Araba). Hilaren 23an sailkapen estopadak jokatuko dituzte, eta 24an, finalak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.