[Argazki galeria] Harresirik gabeko herria, eta elkartasun eredu

Eragile ugarik, ordezkari politikoak eta herritarrek bat egin zuten Errenteria-Orereta harresirik gabeko herria dela eta errefuxiatuak ongietorriak direla esateko.

Ikerne Zarate Gartziarena

Errenteria-Orereta

2016/04/19

Errefuxiatuen aldeko eta Europaren aurkako neurrien elkarretaratzea atzo.

Hamarnaka lagun bildu ziren atzo Agirre Lehendakariaren plazan dagoen Lampedusako mosaikoaren aurrean. Errefuxiatuek bizi duten egoera salatzea zuten helburu, eta orain urtebete, Lampedusa inguruan ito ziren 700 errefuxiatuak gogoan izatea. Egoera gogorrari, berri gogorragoa gehitu zitzaion atzokoan, beste 400 errefuxiatu ito baitziren. “Berri triste eta gogorra heldu zaigu gaur, beste 400 pertsona hil dira”. Hitz horiekin hasi zuen aurkezleak elkarretaratzea. 50 eragile inguruk deitutako protesta 19:30ean hasi bazen ere, aurretik jende mordoa zen zain dagoeneko Lampedusaren mosaikoaren aurrean. Eragile ugarik, ordezkari politikoak eta herritarrek bat egin zuten Errenteria-Orereta harresirik gabeko herria dela eta errefuxiatuak ongietorriak direla esateko, eta bide batez elkartasuna adierazteko gerratik ihesi Europara babes bila etorri diren pertsona horiei guztiei. Hiru pankarta izan ziren elkarretaratzean, Emakume errefuxiatuak, bi aldiz kolpatuak zion Kolpe Morea gazte talde feministarenak. Europar Batasuna eta Turkiaren akordioari ezetz zioen mezua ere presente izan zen atzoko protestan, eta azkenik, Mediterraneoan hildakoak oroitzeko pankarta. Gobernuen eta Europaren itxikeriaren eta krudeltasunaren aurrean, herritarrek elkartasunarekin erantzun dute beste behin ere.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.