Udal haurreskolen matrikulazioa maiatzaren 2an zabalduko dute
Hilaren 27an, asteazkena, ateak zabalik izango dituzte bi haurtzaindegiek instalazioak eta bertako hezitzaile eta langileak ezagutu nahi dituzten gurasoentzat, 16:30etik 19:30era.
Goialde eta Uztargi Udal Haurreskolek gaur eguerdian aurkeztu dute matrikulazio kanpaina. Goialdeko Itsaso Etxenike eta Uztargiko Nerea Zaragozanok Garazi Lopez Etxezarretarekin batera eman dituzte xehetasun guztiak. Maiatzaren 2tik 11 arte izango da zabalik matrikulazio epea, baina aurretik, hilaren 27an, asteazkena, ateak zabalik izango dituzte bi haurtzaindegiek instalazioak eta bertako hezitzaile eta langileak ezagutu nahi dituzten gurasoentzat, 16:30etik 19:30era.
2015ean eta aurten jaio diren 434 haurren etxeetara eskuorria bidali dutela esan du Lopez Etxezarretak, “gurasoek Uztargi eta Goialde haurreskolen eskaintza zuzenean ezagutu dezaten”. Uztargik zein goialdek zerbitzu publikoak direla, euskaldunak eta kalitate ona bermatzen dutela gaineratu du Hezkuntza zinegotziak eta haiek ezagutzera gonbidatu ditu 0 eta 2 urte arteko haurrak dituzten gurasoak.
Etxenikek eta Zaragozanok, bi haurreskolen eskaintzaren gainekoak azaldu dituzte. Goialde Haurreskolan 2 gela dituzte, “etxeko giroa, familiartekoa bermatzen du haurreskolak”. Gurasoek gainera ez dutela haurra haurreskolara eramateko presaka ibili beharrik gaineratu du, “aparkatzeko arazorik ez dagoelako”. Haurraren mugimendu librea errespetatzen dutela gaineratu du Etxenikeketa hezitzaileak etengabe prestatzen ari direla esan du.
Bi hezitzaile taldeko
Eusko Jaurlaritzak ezarritako ratioen arabera, 0-1 urteko gelan zortzi haur dituzte gehienez, eta 1-2 urtekoen gelan berriz, hamahiru. Utzargin zein Goialden bi hezitzaile daude etengabe haurrekin, “guk ematen diegu jaten eta guk lotaratzen ditugu, hezitzaileok”, esan du Zaragozanok. Goialdek dituen oinarri berak ditu Uztargik ere. Azken horrek 5 gela ditu eta haurreskolak gainera, belarguneak eta gela oso handiak dituela esan du Zaragozanok. Sukaldaria bertan dute eguneroko haurren bazkaria prestatzeko, eta Ekolapiko programaren barruan dagoenez janari ekologikoa eskaintzen dute bertan. Ordutegia bietan bera da, 07:30etik 17:00etara. 
