35 jarduerarekin heldu da Oarsoaldeko udako kirol kanpaina
Errenteria, Lezo, Oiartzun eta Pasaiako udalek bosgarren urtez antolatu dute uda kirol kanpaina.
Errenteria, Lezo, Oiartzun eta Pasaiako udalek bosgarren urtez antolatu dute uda kirol kanpaina. Gaur goizean aurkeztu dute kanpaina Irlentz Ortega, Ion txasko, Lore Suarez eta Enekoitz Markos Lezo, Errenteria, Pasaia eta Oiartzungo Kirol zinegotziek hurrenez hurren, Lezoko skate pistan.
Oarsoaldeko lau udalek osatzen duten Eskualdeko Kirol Koordinazio Mahaiak sustatu du aurreko urteetako arrakasta ikusita aurtengo kirol programazioa ere, udarari begira helburu argi batekin, Ortegak esna duenez, “lau udalen baliabideak modu eraginkorragoan erabiltzea eta herritarrei aukera zabalagoa eskaintzea.
Txaskok aurten 3 eta 16 urte bitarteko haur eta gazteei begira 35 jarduera eskainiko dituztela programaren barruan esan du, “aurreko urteetan bezala helduei zuzendutako jarduerak ere izango dira”. Eskaitzaren artean igeriketa, padeela, irristaketa familian, bela edota urpekaritza. Berrikuntzak txertatzeko esfortzua egin dutela lau udalek gaineratu du Txaskok eta horien barruan irristaketa kirolak zabaltzea eta Triatloi eskaintza aipatu ditu: “Irristaketari dagokionean azken urteetako eskaintza borobiltze aldera beste bi modalitate eskainiko ditugu, scooter eta longa”. jarduera horiek Sportland Oarsoaldea kirol klubak gidatuko ditu. Triatloi Eskolaren ardura berriz, Serviociok izango du.
Itsasoarekin zerikusia duten jarduerei garrantzia ematen jarraitu nahi dutela aurten ere esan du bestalde, Markosek: “Aurreko urtean hasitako bela eta urpekaritza ikastaroekin jarraituko dugu. Zirkoa parkean ere bigarren urtez eskainiko dugu”.
Piraguak alokatzeko aukera dagoela Donibanen ekarri du gogora Suarezek. Itsaso jarduerak indartzeko adibide garbia dela eskaintza hori gaineratu du. Informazio gehiago lortzeko 943 34 53 71 telefono zenbakira deitu dezakete interesdunek.
Izena emateko epea maiatzaren 4an, asteazkena, zabalduko dute eta eskaintzaren berri emateko 7.500 diptiko banatuko dituzte Oarsoaldeko ikastetxeetan zein kirol instalazioetan. Informazio gehiago lau udalerrietako kirol instalazioetan jaso daitezke. 
