Feriaren helburua, baserritar produktuen feriek bizi duten beherakadari aurre egitea da.
Iazko Lore eta landare azoka bereziaren irudi bat.
Errenteriako VIII. Lore eta Landareen Feria Berezia egingo dute larunbatean Xabier Olaskoaga plazan Behemendi Landa Garapenerako elkarteak, Errenteriako Udalak eta Dekolore elkarteak antolatuta. Feriaren helburua, baserritar produktuen feriek bizi duten beherakadari aurre egitea da, eta larunbatean lore zein landare askotarikoen erakustoki paregabea bihurtuko dute Xabier Olaskoaga plaza. Beherakadaren atzean berriz, orokorrean lehen sektoreak bizi duen beherakada eta erosleen ohitura aldaketak daudela esan dute antolatzaileek.
Gipuzkoako lore eta landare ekoizle profesional nagusiak bilduko ditu feriak 9:00etatik 14:00etara 130 metro kuadroko erakusketan. Eskaintza zabala izango da bertan, eta garaiko landareak, kanporako zein barrurako landareak, zuhaiskak, landare usaintsuak eta sukaldaritzarako erabiltzen direnak, kaktusak, landareekin egindako bitxiak, edota lore prentsatsuekin egindako konposaketak erosteko aukera izango dute bertaratzen direnek.
Haurrentzako tailerra
Haurrentzako landaketa eta lore lehorrekin eskulanak egiteko tailerrak egingo dituzte azokan bertan 11:00etatik 13:00etara. Azokan berriz, Dekolore elkarteko hamabi ekoizlek hartuko dute parte. Elkarte horrek bailarako landa Garapenerako elkarteen eta udaletxeen laguntza baliatuta, mota honetako ferien antolaketa sustatu nahi du Gipuzkoako herri nagusietan.
Bederatzi landare haztegik ere hartuko dute parte azokan. El Montañes haztegiak landare usaintsuak eta apaingarriak eramango ditu; Islaya haztegiak, berriz, kaktusak; Zunoyar lorategiak barruko landareak, apaingarriak eta bildumakoak eramango ditu; Aritzkurengo Tiendukak kosmetikako eta medikuntza naturaleko artisau produktuak izango ditu postuan; Hazi ekologikoak sendagarri diren eta sukaldaritzan erabiltzen direnlandare eta haziak eramango ditu azokara; Lore Prentsatuak, lore prentsatuekin egindako koadroak; Ojarascak lore eta hosto naturalekin egindako bitxiak; Flores Ganchillok lore motiboz egindako bitxiak; Xaboi naturalak, bere ekoizpeneko landare usaintsuekin egindako xaboi naturalak izango ditu salmentan; Gure lurrak sendabelarrak, eta azkenik, Atxolak landare usaintsuak eta sendabelarrak salduko ditu.
