[Argazki galeria] Artisauena da Merkatuzar gaurtik igandera arte

44 artisauen postuak eta lanak bildu dituzte bertan eta horietatik 17 berriak dira.

2016/04/29

Zabaldu ditu ateak XXXVIII. Euskal Herriko Ereintza Eskulangintza azokak. Artisautzaz gozatu eta hamaika produktu ikusteko aukera izango da hiru egunez Ereintza Elkarteak antolatutako azokan, baina berrikuntzak eta sormenak ere izango dute lekua. 44 artisauren postuak eta lanak bildu dituzte bertan, horietatik 17 berriak dira Merkatuzarreko plazan. Euskal Herri osoko ordezkaritzari, Espainiako Estatuko sei herrialdetatik heldutako artisauak batu behar zaizkio aurtengo edizioan. Gaurko inaugurazio ekitaldian Julen Mendoza alkateak esker hitzak izan ditu Ereintza eta Artiolarentzat egiten duten lanaren harira, eta gogorarazi du Errenteriak apustu sendoa egin duela artisautzaren alde; Torrekuan artisautza bultzatzeko martxan jarritako proiektua nabarmendu du horren harira. Artisauak zoriondu ditu, bestalde, “ez delako erraza izaten eta jarraitzen duzuelako, berritzen gainera, ekarpen ekonomikoa eta kulturala egiten”. Babes Zibileko kideei ere egin die aipamena, “itzalean egiten duten lan handiarengatik”. 12:00 pasatxo zirela moztu dute zinta eta ordezkari politikoen bistarekin zabaldu dute azoka. Aparkalekua Lousadan Bihartik astelehenera arte Lousadan aparkalekua jarri duela jakinarazi du udalak. Errenteriara eskulangintza azoka ikustera hurbiltzen direnek autoa aparkatzeko aukera izango dute bertan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.