Jaixki AFT areto futbol taldeak irabazi beharra dauka bihar Gipuzkoako Lehen Mailan jarraitu nahi badu
Jaixki AFTren jokalariak
Finala du bihar Jaixki AFT areto futbol taldeak. Gipuzkoako Lehen Mailari eusteko helburu bakarra dute jokalari lezoarrek: irabazi. Lauburu Ibarra taldearen kontra partida jokatu behar dute bihar, 19:00etatik aurrera, Bekoerrotan. Zaleek aulki guztiak bete behar dituzte herriko taldeari babesa emateko.
Honakoa da egoera. Gipuzkoako Lehen Mailako 11. postuan dago Jaixki AFT, 18 punturekin. 12. eta 13. postuan daudenek galduko dute maila: 12. Ataun dago 17 punturekin, eta 13. Irudek Barrantol taldea 3 punturekin, jada jaitsita. Hortaz: lezoarrek partida irabaziko balute, salbazioa eurena litzateke, maila mantenduko lukete. Agertoki horretatik kanpo gauza zaildu egiten da.
Izan ere, Jaixkik irabaziko ez balu, Ataun taldeak Tellatuberri Zaldibiren kantxan zer egingo duen (biharko 12:30ean hasiko da partida) kontuan hartu beharko litzateke. Hau da, lezoarren partidaren ordurako, Ataunen emaitzaren berri izango da aurkari zuzenaren partida goizez delako, eta Jaixkirena arratsaldez.
Horrela, Jaixkik nahiz Ataunek berdinduko balute, arazorik ez, bakoitzak egin duen postua mantenduko luke. Baina Jaixkik galdu eta Ataunek punturen bat lortuko balu (berdindu edo irabazi) zorigaiztoko 12. postura pasatuko lirateke lezoarrak, hau da, Gipuzkoako Bigarren Mailara jaitsiko lirateke. Sailkapen nagusian puntu berdinketarekin ataundarrak lirateke biko borroka horretan garaile, Jaixkirekin ligan jokatutako bi partiden gol aldea eurena delako (hiruna egin zuten lehenik Lezon, Ataunek 5-3 irabazi itzuliko partidan).
Lezoarrek itxaropentsu egoteko arrazoiak badituzte. Liga bukaera ona egin dute. Sailkapen nagusian dituzten 18 puntuetatik 10 azken sei jardunaldietan lortu dituzte.
Bestalde, honakoak dira Lezoko kirol taldeen gainontzeko partidak:
FUTBOLA
Gizonen Erregional Preferentea
- Allerru-Vasconia, bihar (larunbata) 16:00etan Plazetan
Gizonen Lehen Erregionala, Kopa
- Allerru-Dunboa Eguzki, bihar (larunbata) 18:00etan Plazetan
Emakumeen Erregionala
- Ordizia-Allerru, bihar (larunbata) 17:30ean Ordiziako Altamira zelaian
Gizonen Gazteen Ohorezko Maila
- Hondarribia-Allerru, etzi (igandea) 15:30ean Hondarribiko Hondartza zelaian
SASKIBALOIA
Gizonen Gipuzkoako Bigarren Maila
- Erroibide Irun-Allerru, bihar (larunbata) 18:00etan Irungo Azken Portu kiroldegian
ARETO FUTBOLA
Gizonen Gipuzkoako Lehen Maila
- Jaixki AFT-Lauburu Ibarra, bihar (larunbata) 19:00etan Bekoerrotan
