Listorreta-Barrengoloiako informazio bulegoa asteburuan zabalduko dute
Parke naturalaren natura zein kultura ondarearen gaineko informazioa jasotzeko aukera izango dute bertaratzen direnek.
Aiako Harriko Parke Naturaleko Listorreta-Barrengoloiako udako informazio bulegoa asteburuan zabalduko dute. Bertara hurbiltzen direnek, aurten ere, parke naturalaren natura zein kultura ondarearen gaineko informazioa jasotzeko aukera izango dute bertan. Mendi ibilbideak, monumentu megalitikoak, Aitzpitarteko haitzulo prehistorikoak, Añarbeko baso erreserba, landareria eta fauna mehatxatuen gaineko informazioa eskura izango dute, besteak beste.
Inguruaren kultura-ondarea eta bioaniztasun maila altuak gida baten eskutik ezagutzeko aukera izango dute, gainera, hala erabakitzen dutenek.
Informazio bulegoa urrira arte izango da irekita ostiraletan 16:30etik 20:30era, eta larunbat, igande eta jai egunetan, berriz, 08:30etik 14:30era eta 16:00etatik 20:30era. 
