Parte hartze zinegotzi Miriam Cano eta hirigintza zinegotzi Nahikari Oterminek Portuaren Plan Bereziari alegazioak aurkezteko bideen berri eman dute
Gipuzkoako Foru Aldundiak apirilaren 26an eman zion lehen onespena Portuaren Ordenaziorako Plan Bereziari eta dagoeneko zabalik dago proiektuari alegazioak egiteko epea. Udalak jakinarazi duenez pasaitarrek 45 egun dituzte beren alegazioak aurkezteko. Ekainaren 27ra arte izango da aukera.
Pasaiako Udaleko hirigintza zinegotzi Nahikari Oterminek eta parte hartze zinegotzi Miriam Canok eman dute gaur prentsaurrekoa, udalak “pasaitarrei eskainiko dizkieten erraztasun eta aukeren berri” emateko.
“Pasaitar askok ez dute Plan Berezia ezagutzen, beraz, lehendabizi, honen inguruko informazioa eman behar diegu, ondoren, beren alegazioak egiteko” azaldu du Oterminek, eta informazio eman asmoz zabaldu dituzten bideen berri eman du segidan.
Oterminek jakinarazi duenez, aldundiak
webgune bat jarri du martxan Plan Bereziaren gaineko informazioarekin. Horrez gain, zalantzak izanez gero, galderak
emailez argitzeko konpromisoa hartu du udalak. Azkenik, jakinarazi dute
udal webgunean eredu orri bat egongo dela eskuragarri, behar duenak erabili dezan.
Hainbat bide aukeran
Miriam Canok azaldu duenez, pasaitarrek alegazioak aurkezteko hainbat bide izango dituzte aukeran. Herritarrek, aldundian erregistratu ditzakete beren alegazioak ofizialki eta zuzenean, baina baita Pasaiako udaletxean eta Trintxerpeko udaltzaingoan ere.
Posta elektronikoa ere erabili ahal izango da alegazioak helarazteko. Dena den, zinegotziek ohartarazi dute udaletxean erregistratutako alegazioak ez direla ofizialak izango udal ordezkariek alegazio horiek aldundian aurkeztu eta ofizialki izenpetzen dituzten arte.
Alegazioak udalaren bidez egiten dituzten pasaitarrei, zigilatutako egiaztagiri bat emango diete alegazioa jaso den egunaren datarekin.
Pasaian alegazioak aurkezteko epea ekainaren 17 bukatuko da, ondoren udalak aldundian erregistratzeko denbora izan dezan.
Azkenik, alegazioak postetxeetan ere erregistratu daitezkeela jakinarazi dute. Horretarako, gutun-azala irekita eraman beharko du alegazioa aurkeztu nahi duenak, zigilatu ahal izateko. Kasu honetan, bidalketa eta zertifikazio kostuak norberak ordaindu beharko lituzke.
Udalaren alegazioak
Udalak, bere aldetik, Portuaren Plan Bereziari alegazioak egingo dizkiola iragarri dute gaur Oterminek eta Canok. Alegazioak lantzen ari direla zehaztu dute, eta horien berri, Gipuzkoako Foru Aldundian aurkeztu ondoren emango dutela gaineratu.
