[Argazki galeria] 'Pescaus', zerua ukitzear

Pescados Ferreres Anaiak areto futbol taldeak eskura du Euskal Ligara igoera, finalerdietako partida latza irabazi ondoren

Urko Etxebeste Petrirena

Lezo

2016/05/09

Jokalariak, larunbateko garaipena ospatzen

Gipuzkoako Lehen Mailako igoera play off-eko finalerdietako partida 5-2 irabazita, Euskal Ligara igotzeko partida bakarra irabazi behar du Pescados Ferreres Anaiak Antxoko areto futboleko taldeak. Partida hori larunbatean jokatuko du, Aretxabaletan (19:00etan), Ventanas ISU Leihoak Lasarte-Oriako taldearen kontra. Ederra prestatzen ari dira antxotarrak finalerako. Larunbat arratsaldeko finalerdian lanak izan zituzten antxotarrek Lauburu Ibarra gainditzeko. Partida hasi eta gutxira 1-0 aurreratu ziren antxotarrak, baina kanpokoek, beharbada etxekoen urduritasunaz baliatuta, lortu zuten markagailua irauli eta 1-2 aurretik jartzea. Ezinegonak hartu zuen orduan Donibaneko kiroldegia: hamarnaka antxotarrek betetzen zuten bertako harmaila nagusia, festa giroan. Bigarren zatian, ordea, kasta atera zuten zuri-gorriek. Kasta, eta joko ona. Apurka partida eurena egin zuten, gogoz, eta 2-2koa lortu arte ez zuten etsi. Behin lasaitasunaren gol hori lortuta, garaipenaren bila bihotza zabalik atera ziren Pescaus-eko jokalariak. Eta 3-2koa iritsi zenean, festa. Festa harmailetan, eta kantxan. Handik aurrera jarraian iritsi ziren partidaren bukaeran garaipen errazaren itxura eman zuten golak, 5-2. Legezko 60 minutuak agortuta, kantxa urdina zuri-gorri bihurtu zen, zaleek pista hartu zutelako jokalariekin batera garaipena ospatzeko. Eserlekuetan, denak zutik, txaloka, algaraka. Zerua ukitzear daude. Finala larunbatean dute. Autobusak aterako dira Antxotik taldea babesteko. Antxo Areto Futbol Taldea sortu zenetik, beti, sasoi bakoitzean, maila bat igo da taldea sasoiko. Aurten ere horrela izan daiteke. Ospakizun eta ospakizun artean, elkartasun keinua egin zuten jokalariek eta zaleek. Markel Merino haur lezoarrarekin argazkia atera zuten. Izan ere, haren aldeko 24 orduko korrikaldia egin behar dute Oarsoaldean maiatzaren 27tik 28ra.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.