Udal ludoteketako ordutegia zabaldu dute

Erabakia pozik hartu dute erabiltzaileen gurasoek

olatz mitxelena

2016/05/09

Haurrak jolasean Antxoko ludotekan

Lan egunetan 20:00ak arte izango dira zabalik, eta larunbatetan 11:00etatik 13:00etara. Ordutegia zabalduz, haurrak aste barruan lasaiago ibiliko direla uste dute ludoteketako arduradunek handienen ordutegia ordu erdiz zabalduko dutenez, ez direlako haur guztiak ordu berean elkartuko. Larunbateko saioek ere oso harrera ona izan dutela jakinarazi du Gazteria Departamentuak. Batez beste, 80 haur joaten dira larunbata goizetan ludotekara. Gainerako egunetan 300 haur eta bazkide joaten dira udal ludoteketara. Orain dela lau urte murriztu zuten ordutegia ludotekek, eta ordutik ari ziren familiek ordutegia zabaltzeko eskatzen, behin eta berriz. Hitzarmenaren aldaketa Gipuzkoan orain dela lau urte sinatu zen lehen aldiz esku-hartze sozialari buruzko hitzarmena, eta hitzarmen horretan, besteak beste, ludoteketako hezitzaileak hartzen dira barne. Hitzarmen horrek aldaketa nabarmena ekarri zuen hezitzaileen lan-baldintzetan, ordura arte ez zutelako hitzarmen propiorik. Hitzarmen hori Pasaian 2012-2013 ikasturtean sartu zen indarrean, eta horren aplikazioak pertsonaleko kapituluan igoera ekarri zuen. Aurrekontua izan zutenez handitu, ordutegia murriztu behar izan zuten, astelehenetik ostiralera egunero ordu erdi kenduz, eta larunbat goizetan ematen zen bi orduko zerbitzua kenduz. Haur eta gazteen arloko politikaren arduradun duen Gazteria eta Kirol Sailak, udal ludoteken zerbitzua indartu ahal izan du, “arlo horretako zutaberik garrantzitsuenetakoa” direla iritzita. Horregatik, eta gobernu taldeak 2016. urtean aurrekontu nahikoa esleitu duenez zerbitzuaren jatorrizko ordutegia berreskuratzea erabaki dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.