Albaolak lankidetza hitzarmena sinatu du diputazioarekin

Proiektua kudeatzeko fundazio bat sortzeko aukera aztertzen ari dira erakundeak

olatz mitxelena

2016/05/12

Xabier Agote eta Denis Itxaso, gaur, hitzarmena sinatzen

Lankidetza hitzarmena sinatu dute gaur bi aldeek San Juan baleontziaren erreplika eraikitzeko, “proiektuari egonkortasuna eman eta lehen mailako erakargarri turistikoa bihurtu dadin”. Kultura diputatu Denis Itxasok nabarmendu duenez, Albaolaren proiektua, egun, “Gipuzkoak Donostiatik kanpo duen eskaintza erakargarrienetako bat da, eta osoki bat dator aldundia garatzen ari den estrategia turistikoarekin”. Diputatu pasaitarraren arabera, “fluxu turistikoak orekatzen laguntzen du” Albaolaren proiektuak, “Donostiak erakarritako turismoa hartuz”. Horrez gian, galeoiak etorkizunean Pasaiako Badiaren eraldaketan rol garrantzitsu bat jo dezakeela sinetsita dago Itxaso. Aldundiak eta Albaolak gaur sinatu duten hitzarmenak Ondartxoko ontziolaren erabileraren lagapena eguneratu, berritu eta zabaldu beharra agerian utzi du, eta horretarako, Pasaiako Portuko Agintaritzaren laguntza eskatu dute bi aldeek. Izan ere, Kultura departamentuaren ustez, “azken urteetan proiektuak noraezean ibili behar izan du erakundeen babes jarraiturik izan ez duelako”. Egonkortasun hori lortzeko bidean, Denis Itxasok uste du, “fundazio publiko bat eraikitzea dela formularik egokiena, lurralde eta tokiko erakundeak bertan direla”. Fundazio horrek lan egitasmoak, urteko aurrekontuak eta egin beharreko ekintzak onartuko lituzke, “bateragarria izan daitezen proiektuaren erakargarritasun turistiko eta kultura eta antolakuntzaren segurtasun eta ziurtasuna”. Fundazioa eratzeko prozesuak, baina, luze jo dezake oraindik, eta horretara itxaron gabe aldundiak Albaolari 200.000 euroko diru laguntza ematea erabaki du San Juan baleontziaren erreplika eraikitzeko eta proiektuak oraintxe dituen beharrei erantzuteko. Gaur sinatu den hitzarmenaren arabera, Albaolak Ondartxoko Faktoriako guneen erabilera puntualak baimendu beharko ditu, bertan turismo sustapeneko edo ontzi ondareari buruzko ekimenak egiteko.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.