Lurralde antolaketako diputatuak bere agerraldia hilaren 25ean izango dela iragarri du gaur Pasaian.
Lurralde antolaketako diputatu Marisol Garmendia eta Pasaiako alkate Izaskun Gomez, gaur goizean, Trintxerpen
Gipuzkoako Batzar Nagusiek Pasaiako Portuko Agintaritzako lehendakari Ricardo Pen?aren eta aholkulari juridiko Macarena Olonaren agerraldiak antolatzea onartu dute gaur, Pasaiako lonjako gainkostuen inguruan azalpenak eman ditzaten.
EH Bilduren proposamenez onartu dute bien agerraldia diputazioan, eta beste horrenbeste eskatu zion Marisol Garmendia diputatuari orain dela bi aste koalizio bertzaleak, portuko administrazio kontseiluko kide delako. Diputatua, baina, ez da agertu gaur argibideak ematera, eta EH Bilduk gogor kritikatu du agertu ez izana. “Fiskaltzak auzitegira jo duela jakin dugu, sei delituren zantzuak aurkitu baitu. Diputatuak, gainkostuak eta irregulartasunak ezagutu arren, ezkutatu egin zituen herritarren aurrean. Gainera, informazio guztia Fiskaltzaren esku jartzearen kontra bozkatu zuen. Gaur, berriro ere, ostrukarena egin du. Jarrera hau onartezina da”, salatu du Jon Albizu batzarkideak.
Pasaian izan da gaur goizean Lurralde antolaketako diputatu Marisol Garmendia, Izaskun Gomez alkatearekin biziberritzearen barruko azken lanak bisitatzen. Hedabideetako galderei erantzunez bertan adierazi duenez, hilaren 25ean du agerraldia, 09:00etan, EH Bilduren eskariz.
“Irregulartasun oso larriak”
EH Bilduko ordezkariaren esanetan, “oso larriak” dira lonjako obretan agertu diren irregulartasunak. Sei delituren zantzuak daude Fiskaltzaren aurrean jarritako salaketaren oinarrian: “prebarikatzea, diru publikoa oker erabiltzea, agiriak faltsutzea, iruzur egitea, eroskerian aritzea eta ordainarazpen ilegalak egitea”.
Horiez gain, Pasaiako portuko lonjako obrek 7 milioi euroko gainkostua daramatela salatu du EH Bilduk, “aurrekontuan zehaztutako gastua baino %46 handiagoa”.
“Ustezko delitu larri horien aurrean, Gipuzkoako Foru Aldundiak duen jarrera iluna onartezina” dela uste du koalizio abertzaleak eta e”erakunde publiko batean delitu zantzuak antzeman bezain pronto, informazio guztia herritarren, alderdi politikoen eta epaitegien esku” jarri behar dela defenditu du.
Foru Gobernuak, gorabeheren berri ez eman izana deitoratu dute, “eta ez hori bakarrik, Marisol Garmendiak informazioa Fiskaltzara eramatearen kontra bozkatu zuen”, salatu du EH Bilduk.
