Portuak eta jaurlaritzak Herrerako toporako sarbideko eremua eraberritzeko akordioa sinatu dute

Pasaiako EAJk poza agertu du

olatz mitxelena

2016/05/13

Trintxerpe eta Herrerako topo geltokira arteko bidea, gaur egun, ez da bat ere segurua

Atzo sinatu zuten hitzarmena Pasaiako Portu Agintaritzak eta Eusko Jaurlaritzak, eta Pasaiako EAJ pozik azaldu da “Pasaiako badia biziberritzeko proiektuaren barruan azken egunotan eman diren aurrera pausoak direla eta”. Jeltzaleek gogoratu dutenez, apirilaren 25ean, Gipuzkoako Foru Aldundiak lehen onespena eman zion Portuaren Plan Bereziari. Plan Bereziak “portu ertzeko eta herriko 11 hektareatako espazioa birmoldatzeko proiektua” jasotzen du, EAJk esan duenez. Oterminek azaldu duenez, “Plan Berezian egindako aldaketek ez diote aipatu eremuari eragiten”. Horregatik utzi omen dituzte lan hauek Plan Berezitik kanpo, “obren hasiera azkartu ahal izateko”. Eraberritze lanak, urte amaieran hasi eta 12-13 hilabetez luzatuko direla jakinarazi du Oterminek. “2017rako obrak amaituta egotea espero da, pasaitarrek, berdegunez inguratutako eremu publiko berri honetaz gozatu dezaten”, gaineratu du. Zehaztu duenez, Herrerako topo geltokia eta Trintxerpe lotuko dituzte “ibilbide atsegin eta seguru batekin”. Horretarako, alde batetik, Eusko Jaurlaritzak 5 milioi jarriko ditu, eta bestetik, Pasaiako Portu Agintaritzak, Eusko Jaurlaritzaren esku jarriko ditu jabetza publikoko lur eremuak. Oinezkoentzako eta txirrindularientzako atonduko dute eremua, eta berdeguneak izango dira ibilbide osoan. “Obrek, pasaitarren bizi kalitatea eta segurtasuna” hobetuko dutela adierazi du Oterminek. “Itxura aldaketa erabatekoa izango da, urte luzez itxaron dugun aldaketa da gainera, eta biziberritze proiektua bukatzean, modernoagoa, atseginagoa, erakargarriagoa eta aisialdi eta negozio aukera berriak eskainiko dituen Pasaia bat izango dugu” gaineratu du. Amaitzeko, EAJko bozeramaile eta udaleko hirigintza zinegotzi Nahikari Oterminek gogorarazi du, hau guztia erakunde guztien inplikazio eta borondateari esker atera dutela aurrera, eta oraingoan “Pasaiaren biziberritzea amets hutsa izatetik, errealitate izatera pasako dela”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.