Saretuz proiektuak Errigorako kontserbak saltzeari ekin dio. Niessen elkartean egin dute kanpainaren aurkezpena.
Atzoko aurkezpenaren talde argazkia
Errigorako oliba olioaren
kanpaina arrakastatsuaren ondotik, Saretuz proiektuak
Errigorako kontserbak saltzeko lanari ekin dio. Atzo aurkeztu zuten kanpaina Niessen elkartean. Hala,
Eskutik eskura Errigora izenburupean, horrelakoak erosteak zein garrantzia duen nabarmendu dute proiektuko kideek: Nafarroa hegoaldeko ekoizleak laguntzen dira, bertan euskalgintzaren alde lanean ari direnen alde egiten da, eta aldi berean, Euskal Herriko elikadura burujabetzaren aldeko ariketa egiten da. Noski, kalitatezko produktuekin.
Horiek nola eskuratu azaltzeko eskuorriak jarriko dituzte Batzokian, Landaren, Amatxin, Xeran, Zuketzen, Arkaitzan eta Aralarren. Beste hainbat modutara ere eskatu ahal izango dira kontserbak, adibidez, Saretuz-ekin harremanetan jarriz.
Kanpaina maiatzean zehar egingo dute egitasmoko kideek. Batetik, zuzenean salduko dituzte kontserben loteak. Bestetik, Errigoaren produktuak jendartean ezagutarazteko hainbat iniziatiba bultzatuko dituzte, tartean pintxo poteak: herriko tabernei Errigorako produktuak eskainiko dizkiete, eta haiek, nahi dutenean, pintxoak egingo dituzte prezio merkean saltzeko produktu horiekin. Ez hori bakarrik. Saretuzek Ipar Euskal Herriko hainbat ikastolarekin duen harreman eta elkarlanari esker, bertan ere salduko dituzte Errigoraren produktuak.
Zehazki, honakoak dira Eskutik eskura Errigora kanpaina berriaren barruan dauden produktuak:
- Zainzurien 12 latarekin kaxa, 41 euroan
- Potxen 12 ontzirekin kaxa, 25 euroan.
- Orburuen 12 poterekin kaxa, 44 euroan.
- Barazki menestrako 12 ontzirekin kaxa, 39 euroan.
- Pikillo piperren 12 ontzirekin kaxa, 32 euroan.
- Hainbat barazki kremarekin 12 ontziko kaxa, 24 euroan.
- Tomate frijitu 12 potoko kaxa, 15 euroan.
Niessen elkarteari aitortza
Saretuzek oroigarria eman zion Niesseni
Atzoko aurkezpena Niessen elkartean egin zuten. Izan ere, Niessen elkarteak (Gau Txori elkarteak bezala), urte osorako Errigoaren oliba olioa hartzeko konpromisoa hartu du, horrela, bertako ekoizleak eta euskalgintza lagunduz. Horregatik, Saretuz-eko ordezkariek oroigarria eman zieten Biteri kaleko elkarteko kideei, esker on keinu modura.
