Kultur aniztasunaren aldeko martxa antolatu dute, lehenengoz. Iztietako plazatik abiatuko da ostiralean 18:00etan eta Zumardia izango du helmuga.
Errenterian 11 kolore martxaren aurkezpena
Kultur Aniztasunaren Nazioarteko egunaren harira Errenterian 11 kolore eguna antolatu dute lehenengoz. Gaur eman dute egitarauaren berri Iztietako Diputazio plazan Nagore Basurto Kultur Aniztasuna, Garapenerako Lankidetza eta Giza Eskubideak azpisaileko zinegotziak eta Samira Goddik, azpiarlo bereko teknikariak hainbat herritarrek lagunduta.
Errenterian hamaika kultura biltzen direla, hamaika kolore, irudikatuko dute ostiral arratsaldean eta horren harira agerraldia ere koloretsua egin dute, birziklatutako gaiekin egindako koilare eta aterkiekin. Kultur aniztasunaren aldeko martxa antolatu dute, lehenengoz. Iztietako plazatik abiatuko da ostiralean 18:00etan eta Zumardia izango du helmuga. Ez da ohiko martxa izango, leloari jarraituz, 11 kolorez jantziko dute, eta horretarako azken bi asteetan lanean izan dira herriko gaztelekuetan Kooperarekin batera lepokoak, aterkiak eta
musika instrumentuak egiten birziklatutako gaiekin. Kontinente ezberdientako karetak ere izango dira martxan eta baita dragoi hori handia.
Zumardira iritsita berriz Atanbora doinua
abestu,
dantzatu eta jo egingo dute, txalaparta, kaxoi flamenkoa, tinbalak eta herriko haur eta gazteek prestatutako perkusio instrumentuekin. Atanbora 11 pausuko koreografia da. 19:00etan berriz, perkusio tailerra antolatu dute. Zumardian izango da eta Amazigh Mustapha musikoak gidatuko du.
Bost kontinenteetako pintxoak eta edariak
Egunarekin bat egin dute Errenteriako erdialdeko 20 tabernek eta beren ekarpena ere egingo dute. Izan ere, zonalde bakoitzari kontinente bat egokitu zaio eta horietako herri batean ohikoa den jatekoarekin egindako pintxoa edo edaria eskainiko dute. Kamerun, Salomon Uharteak, Frantzia edota Japoniako pintxoak eta edatekoak izango dituzte. Iniziatibarekin bat egin duten tabernek bereizgarria izango dute kanpoaldean, aukeratu duten herrialdearen mapa eta pintxoa adierazten dituen kartela eta globoak.
Lanketa, ordea ez da ostiralera mugatuko. Aste osoan zehar DBHko herriko ikastetxeetako ikasleek eta EPAkoek ere kultur pluraltasunaren eta elkarbizitzaren gaineko hitzaldia jaso dute Goddiren eskutik.
Basurtok eta Goddik gaineratu dutenez, larunbatean “aniztasunaren bandera” izango da udaletxeko balkoian. Hura osatzeko herriko ikastetxeetan haurrek egindako mikromarrazkiak erabiliko dituzte. Amaitzeko herritar guztiak deitu dituzte ostiralean martxarekin eta antolatutako gainontzeko ekintzekin bat egitera.
