Kulturartekotasunaren aldeko apustua dela festa esan dute antolatzaileek: "Kultura eta pertsonen arteko aniztasunak dakarren aberastasunaren onarpena, eta bizi baldintzak hobetzeko eskaera".
Munduko arrozen bosgarren aldia aurkeztu dute.
Munduko Arrozen bosgarren edizioa antolatu du Errenteria-Oreretako SOS Arrazakeriak. Festa eta aldarrikapena uztartzen dituen iniziatiban, 10 herrialdetako ordezkarik eta udalerriko bost elkartek hartuko dute parte igandean. Atzo egin zuten aurkezpena Edurne Agirregomezkortak, Maite Berradrek, Gerar Carrerek, Maria Izquierdok eta Mikel Carcedok, eta azaldu zutenez, Europako mugak ireki zain diren errefuxiatuei zuzenduta dago aurtengo edizioa. Kulturartekotasunaren aldeko apustua dela festa esan dute antolatzaileek: “Kultura eta pertsonen arteko aniztasunak dakarren aberastasunaren onarpena, eta bizi baldintzak hobetzeko eskaera”. Aldarrikapen horiek egun zentzu guztia dutela gaineratu dute, “batik bat Europaren asilo politika lotsagarriak errefuxiatuen egoeran sortu dituen ondorioak kontuan hartuta”.
Askotariko jatorria duten pertsonen talde ezberdinek, migratzaile izan ala ez, leku berean sukaldatuko dute arroza. “Arrozak batzen gaituena adierazten du, eta hori sukaldatzeko modu ezberdinak berriz, aberasten gaituen aniztasuna”, esan du Agirregomezkortak.
Musika, dastaketak eta haurrentzako jolasak
Festa 11:00etan hasiko da eta 15:00ak arte musika, bertsolariak, argazki erakusketa, informaziorako postua eta arrozen dastaketa egingo dituzte. Maroko, Pakistan, Senegal, Nigeria, Cabo Verde, Dominikar Errepublika, Venezuela, Sahara, Nepal eta Nikaraguako ordezkariak izango dira arrozak prestatzen Zumardian. Beraiekin batera berriz, Lau Haizetara Euskaltzaleon Topagunea, Kolore Guztiak, Aljarafe, Pasai Donibaneko Yola eta Batasuna elkarteak arituko dira.
“11:00etan hasiko dira parte hartzaileak arrozak prestatzen eta ordu erdi beranduago haur jolasak izango dira karpan”, esan du Agirregomezkortak. Goizean zehar, gainera, te dastaketa ere antolatu dute. Sukaldatu bitartean berriz munduko musika entzuteko aukera izango da. Elkartasun irudiak, Donostiako SOS Arrazakeriako bi kideek egindako argazki bilduma publiko egingo dute bestalde, “Errenteriako bizilagunak azaltzen dira argazki horietan eta errefuxiatuen krisiari erantzun eta haiek laguntzeko prest dagoen jendearekin egindako bilduma da”, azaldu du SOS Arrazakeriako kideak. Publiko egin dira argazki horiek, eta Errenterian lehenengoz egingo dute erakusketa.
