Pasai Donibane Koxtape-San Juan zorioneko dago. Maila nagusietan, herrialde mailan irabazi zitekeen guztia bere egin dute arrosek.
San Juango eta Oiartzungo arraunlariak, atzo Hondarribian, banderekin. Argazkia: Josu Z.
Asteburu biribila izan du trainerilletan Pasai Donibane Koxtape-San Juan arraun elkarteak. Larunbatean, Gipuzkoako Trainerilla Ligako azken jardunaldiko estropadak irabazi egin zituzten arrosen Senior Mailako ontziek Hondarribian, eta horregatik, herrialdeko ligaren jabe egin ziren. Hori gutxi balitz, atzo (igandea), Gipuzkoako Txapelketan, berriz ere sanjuandarrak izan ziren nagusi. Hondarribian jokatu ziren ere txapelketako lehiak.
San Juan, txapeldunen bandera astintzen atzo. Argazkia: Josu Z.
Gizonetan, ligan, arrosen garaipen horrek azalpena behar du. Izan ere, azken jardunaldi horretara lider garbi iritsi zen Hondarribia, eta gainera bigarrenak izan ziren berdeak azken estropada horretan. Baina arraun elkarteek adostutako araudiaren arabera —araudi hori adostu zuten Batelen Espainiako Txapelketak, eta trainerillen ligako lehen estropadek bat egiten zutelako, hortaz, arraun elkarte guztiek ezin izan zuten trainerillen hasierako estropadetan parte hartu: horregatik, puntuagarriak izan diren sei estropadetatik emaitza txarrena kendu behar izan dute kategoria guztietan—, ligako emaitza bat kendu behar izan dute talde guztiek, eta horregatik eta lortutako emaitza onengatik, San Juan izan da garaile gizonetan.
Emakume seniorretan ere, San Juan nagusi. Argazkia: Josu Z.
Emakumeetan arazorik ez du izan San Juanek liga eramateko, beti irabazi duelako, hortaz, nahiz eta emaitza bat kendu behar izan, txapeldun izan da ligan. Batelen Espainiako Txapelketaren ondorioz kalterik handiena izan duen taldea Hibaika izan da (hirugarren izan da ligan).
Ligan ere, Gizonen Gazte Mailako txapeldun Getaria izan da, bigarren Zarautz, eta hirugarren San Pedro. Batelen Espainiako Txapelketaren eragin ezkorra jasan du San Juanek.
Txapelketa
Esan bezala, Gipuzkoako Trainerilla Txapelketako bi kategoria nagusietan San Juan garaile. Gizonen seniorretan Hondarribia izan zen bigarren arrosetatik 10 segundora, Getaria hirugarren, eta Oiartzun eraginkor bat laugarren. Emakumeen seniorretan, Hibaika bigarren izan zen San Juanetik ia 7 segundora. Gazteetan, mutiletan, Getaria txapeldun, Zarautz, San Pedro eta San Juanen aurretik,
