Erabilera da gakoa

Hileko lehen ostegunetan toka eta noka aritzeko hitzordua egin dute 20:00etan Arkaitza tabernan.

2016/05/24

Intzank nirekin hika mezua duten txapak atera ditu AEK-k udalarekin elkarlanean

Hitano ikastaroa amaitu berri du Xenpelar AEK-k, eta orain moldeari arnasguneak zabaldu nahi dizkio. “Hitanoan ere, erabilera baita gakoa”, esan du Borja Arbelaitzek, AEK-ko kide eta Hitano ikastaroan irakasle izan denak. Horren harira, Intzank nirekin hika mezua duten txapak atera ditu Errenteriako Udalarekin elkarlanean euskaltegiak, “hala nahi duenak, gurekin hika aritzea duela adierazteko”. Garazi Lopez Etxezarreta Euskara zinegotziak esan du geroz eta zonalde gehiagotan egiten ari direla hitanoa berreskuratzeko saiakerak, galtzen ari den erregistroa sustatzeko eta berpizteko: “Udalak egoki ikusi zuen proposamena, ikastaroa egin dute, orain nahi dute jendeak jakin dezala ‘hi nirekin hika’ egitea duzu”. Hamar ikasle aritu dira ikastaroan, adin guztietakoak Arbelaitzek zehaztu duenez ,”eta gustura aritu dira”. Ikastaroan Mintza hadi lagun, Mara Mara elkarteak publikatu zuen metodoa baliatu dute Xenpelar AEK-koek. Tarte bat eman diote, gainera, inguruko hitanoari, “batez ere Oiartzungo erregistroari erreparatu diogu”. Orain ikastaroa amaituta, lanketari segida eman nahi diote, eta horretarako Mintzalaguna egitasmoaren barruan hitanoari begirako adar bat sortu dutela azaldu du Arbelaitzek. Hilabete bakoitzeko lehen ostegunean elkartuko dira horretarako, 20:00etan, Arkaitza tabernan. Poteoa egingo dute toka eta noka aritzen diren bitartean. Ikastaroan aritutakoak bilduko dira, baina iniziatibak ateak zabalik dituela gaineratu, eta jendea parte hartzera animatu dute. 100 txapa atera dituzte guztira, eta hika aritu nahi dutenek udaleko euskara zerbitzuan edo AEK-n jaso dezakete, eta baita hileko lehen osteguneko hitzorduan ere.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.