Hondakinen arrantzan ari da 'Mater' itsasontzia
Gaur dute kanpainaren barruko azken nabigazioa, Getariatik Pasaiara; Hitza itsasontzira igoko da eta boluntarioen lana bertatik bertara ikusi eta ikusitakoen berri emateko.
Sentsibilizazio kanpaina bete-betean da egunotan Itsas Gela Elkartea. Hilaren 12an irten zen Pasaiatik Bilbora elkartearen Mater itsasontzia. Han ia astebete igaro ondoren, Bermeorantz irten zen Mater eta Bermeotik Getariara atzo bertan joan zen. Gaur berriz, sentsibilizazio kanpainaren barruko azken eskala egingo du Mater ontziak, Getariatik Pasaiara. 15:00etan irtengo da Getariako porturik itsasontzia, boluntarioen laguntzaz Pasaiara bidean topatzen dituzten hondakinak jasotzeko asmoz. Gauza bera egin duten eskala bakoitzeko. Hitza, gaurkoan, itsasontzian izango da, ikusitakoen berri eman eta ostiraleko papereko ediziorako ingurumen sentsibilizazioa helburua duen kanpainari buruz erreportajea landu asmoz.
Hondakinak eta kutsadura
Itsas Gela elkartearen datuen arabera, Bizkaiko Golkoan 50 milioi tonatik gora hondakin dago 200 metro arteko sakoneran, eta 50.000 tona, golkoaren hondoan. “Ikerketek egiaztatu dute itsasoko elikadura-katea kutsatuta dagoela zaborretik datorren plastikozko substantziekin, eta kontuan hartu behar dugu gizakiarentzat elikadura-kate hori ezinbestekoa dela”, nabarmendu dute.
Proiektu honekin ingurumen arazo honekiko kontzientzia sortu nahi du elkarteak, itsasertzetik gertu zaborra arrantzatzeko esperimentu baten bidez, eta portuan bertan sentsibilizazio-tailerrak antolatuz.
Iaz egin zuten kanpaina lehenbizikoz, eta aurten esperientzia errepikatzen ari dira.
