Donibane Eskubaloiak igoera lortu du
Elgoibarren kontra irabazi zuten arrosek, penaltietan.
Igoera Fasean primerako giroa izan dute jokalari gipuzkoarrek; argazkian eibartar eta elgoibartarrak, sanjuandarrekin batera.
Jesus Pino (entrenatzailea): “Datozen egunotan erabakiko dugu Bigarren Nazional Mailan jokatuko dugun”
Asteburuan igoera jokoan zenuten, eta baita lortu ere. Pozik, ezta? Bai, balorazio oso positiboa egiten dugu, batez ere guretzako kristoren esperientzia polita izan delako. Muskizera joan gara denak, txapeldunak izanda. Joan den urtean ezin izan genuen Igoera Fasea jokatu, Pasaiako talderik ez genuelako, eta aurten, Ereintzarekin egin dugun elkarlanari esker, jolasteko aukera izan dugu. Guretzat oso polita izan da, aprobetxatu egin dugu, eta asteburu osoa Muskiz aldean pasatu dugu denok elkarrekin. Gainera, larunbatean 50 lagun inguru hurbildu ziren Muskizera gu animatzera, eta benetan polita izan da. Larunbateko partidan kiriok dantzan izan ziren zaleak azken uneraino. Partida garrantzitsuena zen larunbatekoa, finalaurrekoa irabaztean lortzen zelako igoera. Gure partida benetan gogorra izan zen. Elgoibar ia partida osoan egon zen gure aurretik, bi-hiru golen abantailarekin. Guk aldeko bakarra lortu genuen partida osoan, eta bai partidan, baita luzapenean ere, guk sartu behar izan genuen azkeneko gola. Guk lortu genuen berdintzea eta jarraitzea. Luzapena bukatzeko bost minuturen faltan atezaina aldatu behar izan nuen, eta atera zenez geroztik Yague izan zen protagonista. Luzapeneko bigarren zatian hiru geldiketa egin zituen, eta gero penaltietan, lautik hiru gelditu zituen. Momentu horretara arte ez zuen jolastu eta partidaren bukaeran kristoren lana egin zuen Yague atezainak. Atzoko finala, baina, galdu zenuten. Hala ere, nahiko positiboa izan zen. Igoera lortuta genuenez aprobetxatu genuen denak jolasteko. Muskiz taldea gu baino hobeto aritu zen partidaren hasieran. Epaileak bizkaitarrak ziren, eta ez dut esango beraiei lagundu egin zietenik, baina gurekin zorrotzagoak izan ziren. Bi defentsak oso gogorrak ziren, eta gurea gehiago zigortu zuten arbitroek. Atsedenaldian gol bateko alde genuen eta bigarren zatian, denbora asko jokalari bat gutxiagorekin jokatu behar izan genuen, eta nabaritu genuen. Gainera, gu, oso nekatuta ginen larunbateko partidarengatik. Galdu egin genuen 25-20, baina ordurako egin behar zen lana egina zegoen. Asteburuaz zer nabarmenduko zenuke? Igandean Eibar eta Elgoibarreko taldekoak han izan zirela eta uneoro egon zirela guanimatuz. Partida bukatzerakoan gipuzkoar talde guztiak elkartu egin ginen, eta denboraldi osoan elkarrekin borrokan eta partida gogorrak izan ditugun arren, Igoera Fasean talde gipuzkoarren artean oso giro ona sortu da. Asko eskertzen ditugu igandean eman zizkiguten animoak. Igoera lortuta nola aurre egingo diozue hurrengo denboraldiari? Momentuz pentsatu behar dugu jokatuko dugun Bigarren Nazionalean edo ez, alde batetik, talde nahiko beteranoa garelako eta jokalariren batek taldea utziko duela badakigulako, eta bestetik, kategoria horretan konpromisoa serioago delako. Egun gehiago entrenatu behar dira eta erabaki egin beharko dugu ia prest gauden horri aurre egiteko, bai kirol aldetik zein ekonomikoki, esfortzua handiagoa izan beharko duelako. Gure artean hitz egin eta datozen egunotan erabakiko dugu Bigarren Nazional Mailan jokatuko dugun ala ez.
