[Argazki galeria] Pasaiako elkarteei merezitako aitortza

Pasaiako elkarteei merezitako aitortza egin diete. Elkarteen gala egin zuten ostiral arratsean Ziriza Etxean.

2016/05/31

Ostiralean aitortza berezia egin zieten elkarteetako kideak, oholtzan.

Pasaiako Elkarteen Gala egin zuten joan den ostiral arratsean Trintxerpeko Ziriza Etxean. Pasaiako Udalak haur eta nerabeekin lanean ari diren elkarteei, begiraleei eta hezitzaileei aitortza egin zien, uste duelako herriaren saretzean, bizitzan eta balioen zabalkundean ezinbesteko lana egiten dutela elkarte horiek. Hamarnaka eragileren ordezkariak bildu ziren Zirizan. Sketx bidez, Badia Eskolako aktoreek, era umoretsu eta satirikoan, azaldu zuen elkarteen eguneroko zereginean egin beharrekoak asko direla. Ez bakarrik zuzenean haurrekin eta nerabeekin lan egiten duten lanagatik, herrietan euren lanak duen garrantziaz ere aritu ziren. Sketxekin azaldutakoa, hitzez adierazi zuten Pasaiako alkate Izaskun Gomezek eta Euskara eta Kultura zinegotzi Miriam Canok. Alkatearen esanetan, haur eta nerabeekin lan egiten duten talde eta elkarteen lana begi bistakoa da, “eredu zarete, herriari bizitza ematen diozue, ezinbestekoak zarete”. Hortaz, galari zentzua emateko, zer ospatu badagoela esan zuen alkateak, gogoraraziz udalak abian duela haur eta nerabeen eskubideak bermatzeko plana. Miriam Canok, bere aldetik, aipatu zuen Pasaian haur eta nerabeekin lanean dabiltzan gehienak kirol elkarteak badira ere, aisialdia eskaintza ematen dutenak kontuan hartu behar direla; orotara 20 bat elkarte ari dira lanean. Aldi berean, gogoan izan zituen aurten urteurren biribilak bete dituzten taldeak, hala nola, Pasaia Kirol Elkartea (75 urte), Ekaitza Aisialdi Taldea (25 urte), Boveda Aisialdi Taldea (50 urte) edo Alkartasuna Euskal Dantza Taldea (52 urte aurten), “ardo onak bezala urtetik urtera ontzen ari zarete. Herri honen bizitza eta historiaren parte garrantzitsu dira. Ezin da jakin zenbat pasaitar ibili den lanean horietan azken urteotan”. Aldi berean, lanean lehen ikasturtea egin duten Pasaiako Pilota Eskola eta Donibaneko Dantza Taldea ere aipatu zituen Canok. Hori esanda, aipatutako elkarte horietako ordezkariak oholtzara igo, eta aitortza egin zieten. Iaz zendu zen Margari Portabales sanpedrotarra ere gogoan izan zuten, San Pedron Lamiak dantza taldearekin egin zuen lan handiagatik; hark eta haren lekukoa hartu dutenek jaso zuten udalaren omenaldia.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.