Lezoko ikasleek elikadurari eta hondakinei buruzko eskaerak egin dituzte

Lezoko ikasleek elikadurari eta hondakinei buruzko eskaerak egin dituzte, ikasturtean zehar landu duten Eskola Agenda 21en barruko udalbatzar berezian.

Urko Etxebeste

Lezo

2016/05/31

Lezoko ikasleak, ostiralean, udalbatzar aretoan.

Eskolako Agenda 21en barruan, aurten, elikaduraren eta hondakinen gaia landu dute Lezoko ikasleek. Hala, ikastetxeetan landutakoa Eskolarteko Forora eraman, eta han erabakitakoak udalbatzan aurkeztu dituzte. Ez hori bakarrik, foro horretan programan parte hartu dutenen partaidetza nolakoa izan den aztertu dute (ikasleak, irakasleak, eskoletako langileak, gurasoak, udala…). Oro har, horien guztien partaidetza egokia izan dela ondorioztatu dute, esanaz, gurasoek eta udalak badutela zer hobetu. Joan den ostiralean aurkeztu zituzten ikasleek udal areto nagusian Eskola Agenda 21en barruan eskola arteko foroan erabakitakoak, eta hartu dituzten konpromisoak. Honakoak dira:

Ikasleen konpromisoak: hamaiketako osasuntsuarekin jarraitzea; otorduetan fruta eta barazki gehiago jatea; hamaiketakoa eta askaria, bilgarriekin beharrean, tupperretan eramatea; kaleak garbi mantentzea.
Udalari zuzendutako eskaerak: herritarrei kaleko gaikako zaborrontzietan hondakinak nahastuta bota ez ditzaten eskatzea; eskolekin konposta guneetara bisitak egiten jarraitzea; herritarrei erretzea txarra dela gogorarazi eta zigarro-muturrak lurrera ez botatzeko eskatzea.

Bukatzeko, hurrengo ikasturtean Eskola Agenda 21en barruan zer landuko duten azaldu zuten: mugikortasun iraunkorra.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.