[Argazki galeria] Jendartea ahalduntzearen alde egin du Duintasunak

Udan etenaldia egingo du Duintasuna jubilatu eta pentsiodunen elkarteak, baina urrian itzuliko dira: "Berriro ekingo diogu gure borrokari, eta gainera, alaitasun handiagoz".

Ikerne Zarate Gartziarena

Errenteria-Orereta

2016/07/04

Duintasunaren manifestazioa.

Hamarnaka lagun bildu dira gaur ere, hileko lehen astelehenean Duintasunak egin duen elkarretaratze eta manifestazioan. Haserre eta suminduta azaldu dira Herriko plazan, eta politikariek diruaren boterearen alde egiten dutela salatu dute. Gertuko arazoetan parte hartzera deitu dituzte herritarrak, “bestela politika betikoek egingo dute eta tabernetako barra inguruko kexa-eskubidea soilik geratuko zaigu”. Horren harira, norabidea aldatu eta jendartea ahalduntzea dela bidea esan dute, “manipula erraza eta konformista” izan ez dadin. Zerbitzu publikoen kalitatea lehentasuna izan behar duela ere esan dute, bestalde, “pribatizazioen eta kontsezio gehiegikeriaren” aurrean, “horretarako ordaintzen dugu eta”. Garaipen txiki handi bat Baikor azaltzeko arrazoiak ere izan dituzte ordea, gaur bildutakoek. Izan ere, Gipuzkoako Batzar Nagusiek EH Bildu eta Ahal Duguren ekimenez pentsio baxuenak 1.080 euroraino osatzea ekatzen zuen proposamena onartu zuten. “Pentsioen osaketa hori ez da soilik langileen ekarpenarekin egingo, Estatuko Aurrekontu Orokorren bitartez ere egingo dute”, azaldu dute. EH Bilduk eta Ahal Duguk proposamenaren alde egin zuten (23 boto) EAJ eta PPk aurka (19) eta PSE-EE abstenitu egin zen. “Egoera honek berriro rakusten du borrokatzen jarraitzen badugu, aldarikapenak lortuko ditugula, eta hori ongi aski dakigu gure belaunaldikoek. Informazio orriak, kartelak, banatzen ditugunean edo sinadurak biltzen ditugunean, jende askok galdetzen digu zerbaitetarako balio duen, eta guk erantzuten dugu etxean gelditzen bagara, ez dugula ezer lortuko”. Udan etenaldia egingo du Duintasuna jubilatu eta pentsiodunen elkarteak, baina urrian itzuliko dira: “Berriro ekingo diogu gure borrokari, eta gainera, alaitasun handiagoz”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.