Zazpi euroan salduko dute 'Oarso' aldizkaria, eta gaur arratsaldetik izango dute erosteko aukera interesdunek.
Jimenez de Aberasturi, Arenzana, Mendoza eta Lakunda aldizkariaren aurkezpenean.
Madalenen atarian
Oarso aldizkariaren 51. aleak argia ikusi du. Artikuluz josirik, Errenteria-Oreretaren historiaren erreferente dela esan du Julen Mendoza alkateak, azken zenbakia aurkezteko gaur eguerdian egindako agerraldian. Zenbakiak ere jarri dizkio aldizkariari. 75 artikulu ditu, eta horietatik 29 (%41) euskaraz idatziak direla nabarmendu du Mendozak, “elebitasunera heltzeko gutxiago falta zaigu eta pozgarria da euskaraz idatzitako artikuluen kopurua iaztik hona igo izana”.
Ez da gauza bera gertatzen genero ikuspegiari erreparatuta, 75 artikulu horietatik soilik 14 dira emakumeek idatzitakoak, %23, hain zuzen ere. “Hurrengo urteetan emakume gehiagoren artikuluak izatea espero dugu”, esan du Mendozak. Garrantzitsua litzateke, alkatearen ustez, “aldizkaria bera gure herriaren historiaren erreferentea bada, emakumeen begirada gabe ez dagoelako ulertzerik”.
Oarso aldizkarian bildutako hainbat artikulu nabarmendu ditu, ondoren, Mendozak: “Andra Mari eta Landarbaso abesbatzen gainekoak daude, lehenak 50 urte bete ditu eta bigarrenak 20 urte”. Aurkikuntza arkeologikoek ere izan dute tartea azken zenbakian. Kapitain Etxean aurkitutako Erdi Aroko sutondoari erreferentzia egiten dio batek, eta Landarbasoko haitzuloetan aurkitutako margoei besteak, “bi aurkikuntza horiek izugarri garrantzitsuak dira, ez bakarrik gure udalerriarentzat, baizik eta Gipuzkoa eta Euskal Herriarentzat”. Erramun Astibia, Jose Mari Azkarraga
Lurgorri, Antton Obeso, Mercedes Garcia edo herriko asanbladaren 40. urteurrenean haren gainean egindako gogoetak nabarmendu ditu.
Mikel Ugaldek bizikidetzaren foroaren gainean idatzitako artikuluari aipamen berezia egin dio azkenik Mendozak.
Juanmi Lakunza erredakzio batzordeko kideak, berriz, Adolfo Leibar, Jose Antonio Loidi edo Ayalderen gainean idatzitako artikuluak nabarmendu ditu, baita Ereintza Dantza Taldeak, Musikastek, Eresbilek, Urdaburuk, Kukaik edo EMTEk egindako kolaborazioak ere.
Kromoetan bildutako Errenteria-Oreretako kirolari, edo lantegien gaineko erreportajea bildu du, bestalde,
Oarsok: Otaño, Zamora, Bueno, Etxebeste, Sanperio, Elicegi edo Galletas Olibeten kromoak azaltzen dira, besteak beste. 1965eko kintoen gaineko argazki erreportajea ere landu dute.
Arratsaldetik aurrera salgai
Zazpi euroan salduko dute
Oarso aldizkaria, gaur (ostirala) arratsaldetik izango dute erosteko aukera interesdunek. Udaletxeko arkupeetan gaur hasi eta hilaren 25a arte erosi ahal izango da, goiz eta arratsaldez. Horrekin batera herriko beste hainbat puntutan ere aurki daiteke aldizkaria: Beraungo Paco kioskoan; Gabierrotako Zubia kafetegian; Iztietako Razquin estankoan eta kioskoan, Osina natur dendan, eta Madalena gozotegian; eta erdigunean, Hostoak, Alameda kioskoa, Etxenike loteria, Maitexa estankoa, Mirentxu liburudenda, Xenpelar loteria, Morrongileta kioskoa, Bitxi kolore eta Foru plazako kioskoan.
