EH Bilduren arabera agerian geratu da herria Portuaren Plan Bereziaren kontra dagoela

Planari egin dizkion alegazioak aurkeztu ditu gaur koalizio abertzaleak.

olatz mitxelena

2016/07/22

Oihane Oronoz eta Migel Mari Torrea, Trintxerpen

Bost alegazio “sinple eta zehatz” aurkeztu dizkio Pasaiako EH Bilduk Portuaren Plan Bereziari, eta gaur eman dute horien berri, Trintxerpen. Funtsean, “udalarena den eskumena lapurtzea” leporatzen diote aldundiari, eta “herritarren bizkar” aritzea, bertakoek eraiki eta erabakitakoa kontuan hartu gabe, eta pasaitarren parte hartzea oztopatuz. Horrez gain, kaiko Herreraren lurrak logistikara bideratuz, “herriaren etorkizuna hipotekatzen” ari direla defendatu du EH Bilduk alegazioetan, ingurumen alorreko araudia errespetatu gabe. Agerraldian Migel Mari Torreak eta Oihane Oronozek “astakeriatzat” jo dute diputazioaren asmoa, baina pozik agertu dira, beren ustez, alegazioen bidez, agerian geratu delako herria planaren kontra dagoela. 300dik gora alegazio Lehengo ostiralean bukatu zen planari alegazioak aurkezteko epea. EH Bilduko zinegotziek jakinarazi dutenez, 300dik gora alegazio aurkeztu dira planaren kontra, Herrera Herrirak bultzatuta. Horrez gain, Pasaiako Hirigintza eta Ingurumen gaietarako Aholku Batzordea dokumentuaren kontrako jarrera agertu izana txalotu dute, eta udalak berak dokumentua ez onartu izana goraipatu. Aitzitik, gogor gaitzetsi dituzte asteazkenean Iñigo Urkullu lehendakariak Pasaiara egindako bisitan esandakoak, eta lotsagarritzat jo dute herriko PSE-EEren eta EAJren jarrera, lehendakariaren hitzak babesteagatik, eta errespetua exijitu dute: “Eh Bilduk, gure herria euren mesedetan erabili nahi izan dutenei, herri honen geroa eraikitze bidean bertan eraiki, adostu eta onartu duguna errespetatzen ez dutenei ozen eta garbi esan nahi die errespeta gaitzala”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.