Hilaren 31n egingo dute Harri Beltza elkarteak urtero antolatzen duen xanistebanen atariko kontzertua, Los Caballeros del Traverso taldearekin.
Joseba Errekalde eta Josune Cousillas, kontzertuaren berri ematen.
Udako kanpaina bukatzeko urtero, xanistebanen atarian, kontzertu bat antolatzen du herrian Harri Beltza elkarteak. Hiesaren kontrako lanean jarduten duen elkarteak, udalaren laguntzarekin, flauta laukote bat ekarriko du herrira hilaren 31ko (igandea da) elizako kontzerturako: Los Caballeros del Traverso. 19:30ean hasiko da musika emanaldia. 20. ekitaldia du kontzertu honek, eta beti uztaileko azken egunean egin ohi izan da.
Claudy Arimany, Lorea Gurrutxaga, Pedro Jose Rodriguez eta Juan Jesus Silguerok osatzen dute flauta laukotea. Kalitate eta eskarmentu handiko musikariak dira.
Josune Cousillas udaleko Kultura zinegotziak eta Joseba Errekalde Harri Beltzako lehendakariak aurkeztu dute kontzertua. Udal ordezkariak elkartearen jardun kulturala nahiz soziala aitortu ditu, eta herritarrak animatu ditu hilaren 31ko, nahiz urtean zehar Harri Beltzak egiten dituen beste jardueretan parte hartzeko.