Igandean hasiko dira festak eta San Inazio Egunean bukatu.
Marmitakoa prestatzen dute urtero Donibaneko jaietan.
Donibanen dena prest da santioak ospatzeko. Igandean hasiko dira barrutiko festarik garrantzitsuenak, eta San Inazio egunean bukatu.
Gazteen bazkariak emango die hasiera jaiei, eta ondoren Elektrotxuflak girotuko ditu bazterrak txupinazoaren ordua iritsi arte. Aurten, Arantza Sagarzazuk eta Gorka Barrosok igoko dute ikurriña udaletxe zaharraren balkoira.
Santio Eguna
Data oso seinalatuak dituzte Donibaneko jaiek, eta lehena astelehenean da, Santiago Egunean. Sokamuturra, Gaztelutxoko Igoera edota dantza solteko txapelketa dira eguneko klasikoetako batzuk. Herri kirolen erakustaldia ere izango da Santiago Plazan astelehen arratsean, Felix Etxezarreta, Ernesto ‘Bihurri’ eta Unai Ugartemendiarekin.
Santa Ana eguna da Donibanen gorriz markatutako bigarren eguna, asteartea. Meza, hamaiketakoa, marmitako txapelketa, abordaia eta Habanerak. Horiek Santa Ana eguna izango denaren zertzeladak, eta hurrengo egunean, berriz, San Pantaleon, sardina erren usainera, Donibanera urtero-urtero jendetza erakartzen duen arrantzale festa.
San Inazio Eguna bitartean hamaika ekitaldi izango dira Donibanen, jai batzordeak mimoz atondutako
egitarauari esker.
Trafiko
Udalak jakinarazi duenez jaiak bitartean barrutiko alde zaharra itxi egingo dute egunero mota guztietako automobilentzat, motoak barne. (
Ikus ordutegi zehatzak egunez egun).
Horrez gain, jaiak bitartean Bizkaia plazako aparkalekua Donibaneko bizilagunentzat gordeko dutela ohartarazi du udalak, eta bisitari nahiz bizilagunentzat Nabalaldeako kaia irekiko dutela iragarri dute.