Emakumeen Etxea eraikitzen
Agintaldi honen barruan Emakumeen Etxea martxan izango da Errenteria-Oreretan. Haren oinarriak adosteko parte hartze prozesua egiten ari dira, urte amaierara arte.
Emakumeen Etxearen gaineko parte hartze prozesua egiten ari dira.
Bidasoan ere egi bihurtu nahi dute Emakumeen Etxea
Gipuzkoako Foru Aldundiaren aurreko agintaldiko partaidetzazko aurrekontuen barruan adostu zuten diru zati bat Bidasoan Emakumeen Etxea egiteko. Gobernu aldaketa izan zen iazko maiatzean, eta Berdintasun zuzendaria aukeratzeko denbora apur bat pasatu zela ekarri du gogora Karmele Tolosa Bidasoaldeko Elkarte Feministako kideak. Geldialdi baten ostean, urratsak egiten hasi dira berriz ere, eta parte hartze saioa egin dute Elhuyarrekin, martxora arte. 40 emakume aritu dira guztira. Aste honetan bertan, Hondarribiko alkate Txomin Sagarzazurekin bildu dira. Haren «harrera ona» izan dutela esan du Tolosak. Abuztuaren 2an, berriz, Jose Antonio Santano Irungo alkatearekin bilduko dira. Izan ere, udalak ere inplikatu nahi dituzte. Kokagune zehatzik ez dute, «Irun edo Hondarribian izan berdin zaigu, egokia izatea da gakoa». Udalekin bilduta, ikasturte berrian Bidasoako Emakumeen Etxearen gaineko hitzarmena sinatzea dute helburu orain.Erreakzioak
Prozesuan parte hartzen ari direnen iritziak bildu ditu HITZA-k. Honakoa da lau emakumek egin duten balorazioa. 1-Zergatik ari zara parte hartzen Emakumeen Etxearen gaineko parte hartze prozesuan? 2-Zure ustez, zergatik da beharrezkoa Emakumeen Etxea?
Charo Rodriguez, Bekoz Beko taldeko kidea: “Ongi sentituko garen eremu erreferentziala behar dugu emakumeok”
1// Proiektuaren berri eman zidaten eta interesgarria iruditu zitzaidalako ari naiz parte hartzen. Oso positiboak iruditu zaizkit orain arte egindako bi saioak, gaiak adosteko aukera izan dugu eta ekarpen asko egin ditugu parte hartu dugun emakume guztiok. Oso aberasgarria izan da.
2// Emakumeok biltzeko espazio propioa izatea beharrezkoa dela uste dut. Emakumeen Etxe bat Pasaian izatea nahiko genuke Bekoz Beko elkarteko kideek, gure egituragatik, Pasaiako biztanleria nahikoa banatuta dago eta gure udalerria halako espazioa sortzea nahiko genuke. Halere, uste dugu Oarsoaldean halako etxe bat izatea oso interesgarria dela. Ezinbestekoa, beharrezkoa da, ongi sentituko garen eremu erreferentziala izatea emakumeok».
Karmele Fernandez Boga, Berdintasun Kontseiluko kidea: “Jatorri eta jarduera ezberdinetako emakumeak bildu gara”
1// Berdintasun Kontseiluko eta talde eragileko kidea naiz, eta parte hartzeko konpromisoa hartu nuen hasieratik. Saioak oso positiboak izan dira, pluraltasun handia izan dutelako. Pentsaera, jatorri eta jarduera ezberdinetako emakumeak elkartu gara.
2//Herriarekiko erreferentziazko espazioa eta eskualderako balioko duen gunea behar dugu. Mugimendu feministaren aldarrikapena da hori, Berdintasun Kontseiluak bere egin du eta egungo udal ordezkari batzuk programa politikoan ere sartu dute. Orain da momentua. Estrategia berriak sortzeko tresna izan daiteke Emakumeen Etxea, erakunde politikak ezartzeko garaian gure proposamenak kontuan hartzeko, baita berdintasun kota lortzeko abiapuntua ere.
Eli Etxabeguren, Kolpe Morea taldeko kidea: “Emakumeen Etxea proiektu berriak batera sortzeko behar dugu”
1// Berdintasun Kontseiluko kidea naiz, eta proiektuaren berri hasieratik izan dut. Oso interesgarria iruditzen zait. Gazte bezala, aukera bat da proiektu bat beste emakumeekin aurrera ateratzeko. Prozesu guztia garrantzitsua da, beste emakume batzuk ezagutzeko aukera eman digu, sareak sortu eta elkar ezagutzeko, eta elkarlanean proiektuak sortu badaitezke, apustu izugarria da herriarentzat. Balorazioa oso positiboa da. Oso polita izan da entzutea bakoitza zein errealitatetik datorren, zein ideia dituen, eta etxearen oinarriez hitz egitean bakoitzak nola ulertzen duen ikustea. Gogoz ari gara, ilusio handia dago.
2// Sareak sortzeko erreferentziazko gune bat izateko, leku fisiko bat, elkar ezagutzeko eta batera proiektu berriak sortzeko.
Toñi Redondo, Agustinetako Emakume Taldea: “Garrantzitsua da Emakumeen Etxeak aniztasuna bermatzea”
1// Beharrezkoa iruditzen zait esparru ezberdinetako emakumeek parte hartzea bertan, aniztasuna bermatu dezan proiektuak, eta guztien beharrak ase ditzan. Lehenengo bi saioak oso positiboak izan dira, momentuz oso ideia orokorrez mintzatu bagara ere. Elhuyarreko teknikariak erabiltzen ari diren teknikak beste emakumeekin enpatizatzeko baliagarriak izaten ari dira, eta gutxinaka Emakumeen Etxeak dituen beharren gaineko kontu garrantzitsuak azaltzen ari dira.
2//Emakumeok erreferentzia puntu bat izatea garrantzitsua da. Biltzeko, eztabaidarako, ikasteko eta ahalduntzeko eremua behar dugu. Hau da, zubi bat parekidetasunaren alde aritzeko. Bide horretan, Errenterian Emakumen Etxea izatea beharrezkoa iruditzen zait.
