Eskerrak eman dizkie udalak madalenak ongi atera zitezen lanean aritu diren elkarte, eragile eta norbanakoei, "horien ahalegin eta inplikaziorik gabe ez genuke eta jairik izango".
Herriko Plaza, jendez gainezka.
Madalenak amaitu eta bi egunera heldu da udalaren balorazioa. “Ezin positiboagoak”, horrela baloratu ditu jaiak Ion Collar Kultura zinegotziak eta eskerrak eman dizkie Gobernu Taldearen izenean madalenak ongi atera zitezen lanean aritu diren elkarte, eragile eta norbanakoei, “horien ahalegin eta inplikaziorik gabe ez genuke eta jairik izango”. Eskerrak emateaz gain, zoriondu ere egin ditu.
Aipamen berezia egin die udal departamendu guztiei eta lanean aritu diren langileei, “horien lana ere ezinezkoa baita jaiak aurrera ateratzeko”. mantenua, kultura, udaltzaingoa eta garbiketa zerbitzuaren lana nabarmendu ditu Collarrek, “ahalegina, arintasuna eta eraginkortasunez egin dute lan garbitzaileek jaiak hasi eta amaitu diren arte gure herria eta kaleak jai gune atsegin bilakatzeko”. Osasun ekipoa eta Babes Zibileko kideei ere eman dizkie eskerrak.
Giro ona nagusi
Aurten omendu duten Andra Mari abesbatza aipatu du Kultura zinegotziak eta baita Agustina Otaola frontoian izandako raketisten presentziari erreparatu die bestalde, Collarrek, “gure frontoia eta Errenteria erreferente dira pilota modalitate hori sustatu eta emakume kirolariak aintzat hartzeko”.
Madalenak giro onean gozatu dituztela errenteriarrek eta antolatutako hamarnaka ekitaldietan milaka lagunek hartu dutela parte esan du, bestalde. Holy festaren, txupinazo gaztearen arrakastari aipamen berezia egin dio: “Holy festak aukera eman du txupinazo garbiagoa egiteko eta txupinazoaren ostean Xanti eta Maialen Herriko plazara ateratzeko dantzatzera”. Kontzertuen kopurua eta kalitatea ere aipatu ditu Kultura arduradunak, eta danborradak “zirraragarriak” izan direla gaineratu.
Kuadrillen eguna, berriz, herri oso baten inplikazioaren eta sentimenduaren neurgailu gisa jarri du Collarrek, “herritik eta herriarentzat egindako jaiak izan dira”.
Erasoak salatu
Errenteria-Oreretan jaien testuinguruan izandako bi eraso sexistak izan ditu gogoan zinegotziak, eta horren harira, “herri osoa inplikatu dela” haiek gaitzesti eta eraso egin zaien pertsonei elkartasuna adierazteko nabarmendu du: “Herritarren konpromisoa eta borondatea da eraso sexista gehiagorik ez izatea, ezta bat bera ere”.
Amaitzeko Ane Santesteban Errenteriako txirrindulariari zorterik onena opa nahi izan dio Collarrek Rioko Olinpiar Jokoetan, “Ane sarrritan ametsak bete egiten dira, zure ondoan herri oso bat izango duzu saria lortzeko”.
