[Bideoa eta argazki galeria] Amorru isila Lezon sexu erasoen kontra

Sexu erasoen kontra bildu ziren atzo Lezoko Gurutze Santuaren plazan ehunka herritar. Ez Lezon, ez inon, eta edozein testuingurutan, erasoak ez dituztela onartuko aldarrikatu zuten.

Urko Etxebeste

Lezo

2016/07/28

Ehunka herritar, atzo, Lezoko plazan. Argazkia: Carrera.

Bete egin zen atzo Gurutze Santuaren plaza sexu erasoen kontrako amorrua azaltzeko, eta horrelakorik ez Lezon eta ez inon onartuko ez dela esateko. Ehunka herritarrek hartu zuten herriko plaza nagusia, isiltasun esanguratsuan. Behin elkarretaratzea bukatuta, “ez, ez, ez, erasorik ez” oihuak ordezkatu zuen isiltasuna. Azken egunetan Lezon, Errenteria-Oreretan, Getxon eta Barakaldon izan diren emakumeen kontrako erasoak salatzeko Lezoko elkarte, eragile eta norbanakoek deitutako elkarretaratzea izan zen atzokoa. Herriko ordezkari politikorik ez zen falta izan, eta Oarsoaldeko beste herrietako jendea ere hurbildu zen protesta ekintzara. Elkarretaratzearen hondarrean, elkartasuna adierazi zieten erasotuei. Eta horrelakoak edozein testuingurutan, edozein tokitan gertatzen direla esan zuen hizlariak, “guztion ardura da honekin amaitzea, eta guztiok eman behar diogu erantzuna. Emakumeok zenbatetan gehiagotan jasan beharko ditugu horrelakoak?”. Erasotzaileak ez direla onartuak aipatu zuten elkarretaratze bukaerako irakurketan, “eta eraso bakoitzari erantzuna emango diogu. Baina ezin gara horretan bakarrik gelditu. Norbanako eta kolektibo bezala jendarte haur aldatu behar dugu horrelakorik gerta ez dadin. Horrelakoak, ordea, izebergaren punta ez dira. Egunero ikusten ditugu eredu estereotipatuek sortzen dituzten erasoak, emakumeen gorputzaren objektualizazioa dutenak eredu. Hemen gaude. Eta ez dugu onartuko gehiago horrelakorik”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.