Musika banda, Landarbaso abesbatza eta Buruhandie eta Erraldoien konpartsa batera arituko dira San Inazio eguneko kontzertuan.
Rodriguez, lopez Etxezarreta, Tolaretxipi, Mitxelena, Gonzalez eta Eizmendi.
San Inazio eguneko kontzertua egingo du EMKEren musika bandak igandean. Eta ez da bakarrik arituko, Landarbaso abesbatza izango da protagonista, bere 25 urteurrenaren harira, eta Xanti eta Maialen erraldoi eta buruhandien konpartsak ere bat egingo du kontzertuarekin.
Kontzertuaren berri emateko agerraldia egin dute gaur eguerdian, Josu Mitxelena EMKEren presidenteak, Iñaki Tolaretxipi Landarbaso abesbatzaren zuzendariak, Garazi Lopez Etxezarreta zinegotziak, Carlos Rodriguez musika bandaren zuzendariak, eta Manex Eizmendi eta Iñaki Gonzalez Erraldoi eta Buruhandien Konpartsaren kideak. San Inazio eguneko kontzertua, musika bandak duen zita garrantzitsuenetako bat dela esan du Mitxelenak, “kutunetakoa dugu, xarma eta nortasun berezia duen kontzertu horietakoa”.
Errenteria oinarri sendoko herria dela gaineratu du, “kulturalki oso aberatsa da eta halako proiektuak abiatzeko aukera ematen du horrek. lan handia suposatzen du halako kontzertu batek, baina luxua da”.
Euskal konpositoreen lanak bildu dituztela espreski emanaldirako esan du bestalde, eta proposamen eszenikoari dagokionean, argi eta itzalekin jolasean ariko direla kontzertuan: “Parrokia eta udaletxea argiztatuko ditugu, espazio eszeniko akustiko egoki eta gosoa baliatuz”. Herriko enparantza aukeratu dute kontzertua emateko aurten ere, zazpigarrenez, baina eguraldiak ez balu lagunduko Koldo Mitxelena ikastetxearen patiora eramango dute. 22:30ean izango da kontzertua.
Zuzendari lanetan, berriz, Rodriguez eta Tolaretxipi arituko dira.
Erronka
Ez dela lehenengo aldia abesbatza batekin jotzen duela bandak esan du Rodriguezek. Hala ere, igandekoa erronka izango dela baietsi du, “abesbatza bakoitzak bere nortasuna, tonalidadea dauka eta bakoitzari moldatu beharra dago”. Joko dituzten abestien gainean berriz, ezagunak eta atseginak izango direla publikoarentzat gaineratu du Rodriguezek. Ildo beretik mintzatu da Tolaretxipi, kontzertura “ilusioa handiarekin” joango direla esan ostean. Landarbasorentzat,
a capella abesten duen taldea izanik erronka dela musika bandarekin aritzea nabarmendu du. Emanaldia bitartean gainera, sorpresak izango direla aurreratu du.
Eizmendik eta Gonzalezek berriz, kontzertua ahalik eta politena irteteko saikera berezia egiteko ardura hartu dute, “guretzako aukera paregabea da musika banda eta landarbasorekin batera aritzea”.
Lopez Etxezarretak herritar guztiak animatu ditu azkenik, “Herriko plazaren aldeko apustua oso polita da, eta espero dugu jendea animatzea urtero bezala eta kontzertuarekin gozatzea”.
