Iñigo Legorburu: Hibaika: Luzatu bostekoa
Aurtengoarekin, 5 urte dira jada Hibaikako emakumeen traineruak bere ibilbidea hasi zuenetik. 5 urte bizi hauen joan-etorrian, bizitzan bezala, argilunak , pozak eta tristurak egon dira, baina; batez ere sentimentuak gailendu dira,harrokeriarik gabeko harrotasunezko sentimentuak.
Hasierako garaietako irribarre ironiko haiei erantzuten jakin duzue. Topikoetan soilik sinisten zuten haiei, topikoak eurak zirela demostratu diezue. “Baina nora dijoazte neska hauek?” galdetzen zuten haiei, uretan ederki erantzun diezue, isil-isilik; banderak etxera ekarrita urtez urte.
Baina batez ere, zuen buruei erakutsi diezue zertarako gai zareten. Beste batzuk baino askoz ere baliabide gutxiagorekin, ilusioa bihurtu duzue zuen balio-bide. Balioak, kirol-balioak; sasoi-puntua eta fisikoaz gainetik; ametsak ere badirelako.
Eta Kontxako bigarren igandeko atarian gauden honetan, orain artean egindako guztia hor gelditzen den arren, igandean berriro ezerezetik hasiko zaretela badakizue. Ezerezetik hasi, dena lortzeko.
Eta gertatzen dena gertatzen dela ere, uretara irten aurretik; zaleon mezua bat eta bakarra izango da: eskutik heldu eta bostekoa luzatuko diogu elkarri; etorkizunari begira ere, orain arteko bostekoa urte gehiagotara luzatu dadin.
Ze, euforia eta pozezko besarkadak, geroxeago etorriko dira.
